Лукашэнка загадаў усім беларусам скінуцца на бібліятэку :: Хартыя'97 :: Навiны

Аляксандар Лукашэнка ў чарговы раз пачаў нацыянальную кампанію па добраахвотна-прымусоваму збору грошай на нацыянальную будоўлю. На гэты раз у цэнтры Менску зьбіраюцца ўзводзіць новы будынак Нацыянальнай бібліятэкі, паведамляе сайт тэлеканалу "REN TV".

Праект будынка быў распрацаваны яшчэ ў канцы 80-ых гадоў мінулага стагодзьдзя і адрозьніваўся сваёй складанасьцю. Будынак уяўляе сабой вялікае паўшар`е са шкла - у ім будуць разьмяшчацца кнігасховішчы, чытальні й падсобныя памяшканьні.

Пра кошт праекту тэлеканал не паведамляе, аднак грошай на яго будоўлю ў краіне няма. Кіраўніцтва краіны вырашыла будаваць на народныя ахвяраваньні, якія будуць зьбіраццца (і ўжо зьбіраюцца) у прымусовай форме.

Кожны беларускі служачы абавязаны здаць у фонд будаўніцтва свой дзённы заробак, кожны школьнік - суму, эквівалентную 50 цэнтам ЗША, кожны начальнік - 15 далярам. Кожнай беларускай сям`і рэкамэндавана аддаць 10 адсоткаў ад свайго бюджэту ("REN TV" не паведамляе, бюджэт за які тэрмін мецца на ўвазе).

Такім чынам, улады ўжо здолелі сабраць два мільярды мясцовых рублёў, 25 тысяч эўра і 50 тысяч даляраў ЗША.

Месца пад будучую бібліятэку, як паведамляе "REN TV", выдаткавана ў цэнтры горада Менску. На дадзены момант на ім разьмешчаныя жылыя дамы, жыхароў якіх ужо пачалі тэрмінова высяляць. Да 15 кастрычніка на гэтым месцы, па загаду ўладаў, не павінна застацца ніводнага заселенага дома.

"Іншы будынак бібліятэцы, вядома, патрэбны. Стары ўвесь час цячэ: унікальныя кніжныя асобнікі захоўваюцца ў катастрафічных умовах", - заявіла дырэктар Нацыянальнай Бібліятэкі Галіна Алейнік. Афіцыйна ініцыятарам будаўніцтва выступіў беларускі народ.

Як адзначае "Хартыя`97", гэта ўжо ня першы праект, у які ўцягнутыя грамадзяне краіны. У траўні 2002 году ўсе беларускія турфірмы атрымалі ліст Міністэрства спорту й турызму, у якім іх таксама прасілі "аказаць спонсарскую дапамогу" будаўніцтву "Нацыянальнага цэнтра алімпійскай падрыхтоўкі па тэнісе й настольным тэнісе".

Буйныя кампаніі павінны былі ахвяраваць на будаўніцтва спартовага аб`екту па 1 800 000 беларускіх рублёў, дробныя - 540 тысяч.