Камуністычнага лідэра Вьетнаму ў Менску сустрэлі хлебам-сольлю :: Хартыя'97 :: Навiны

Хлебам-сольлю сустрэлі ў Нацыянальным аэрапорце “Менск” генэральнага сакратара Кампартыі Вьетнаму Нонг Дык Маня, які прыбыў у нядзелю ў Беларусь з трохдзённым афіцыйным візытам. Як перадае карэспандэнт РIА «Новости», высокага госьця сустракалі першы віцэ-прэм’ер ураду Беларусі Сяргей Сідорскі, міністар замежных справаў Міхаіл Хвастоў, шэраг іншых афіцыйных асоб.

Як паведаміў РIА «Новости» прэсавы сакратар беларускага МЗС Павел Латушка, падчас візыту заплянаваныя сустрэчы Нонг Дык Маня са старшынём Савету Рэспублікі нацыянальнага сходу Аляксандрам Вайтовічам, сьпікерам ніжняй палаты Вадзімам Паповым і першым намесьнікам прэм’ер-міністра РБ Сяргеем Сідорскім.

У плян уваходзіць таксама наведваньне Менскага аўтамабільнага завода, прадукцыя якога добра вядомая ва Вьетнаме і мэмарыяльнага комплексу ў памяць ахвяраў гітлераўскай акупацыі “Хатынь”.

Падчас сустрэч і перамоваў, паведаміў Павал Латушка, плянуецца абмеркаваць пытаньні двухбаковых палітычных зносінаў, узаемадзеяньня ў рамках міжнародных арганізацыяў, актывізацыі супрацоўніцтва ў гандлёва-эканамічнай, навукова-тэхнічнай і іншых сфэрах, рэалізацыі існуючага патэнцыялу якога садзейнічае высокі ўзровень палітычнага дыялёгу.

Так, па выніках 2001 году таваразварот паміж Беларусяй і Вьетнамам упершыню за апошнія 10 гадоў, з моманту ўсталяваньня дыпзносінаў, дасягнуў 41 млн. даляраў. Зь іх на долю беларускага экспарту, аснову якога складаюць грузавыя МАЗы, вялікагрузныя кар’ерныя самазвалы БЕЛАЗы, ровэры і матацыклы, а таксама прадукцыя прадпрыемстваў канцэрну “Белнафтахім”, прыпадае трохі болей за 29 млн. даляраў.

Па выніках візыту генэральнага сакратара Кампартыі Вьетнаму плянуецца прыняцьце сумеснага камюніке.

“Мы спадзяемся, -- падсумаваў Павел Латушка, -- што візыт будзе садзейнічаць далейшаму пашырэньню й паглыбленьню палітычнага дыялёгу на вышэйшым узроўні й далейшай актывізацыі ўсяго спэктру двухбаковых зносінаў”.