Акадэмікі “ахвяруюць” на бібліятэку месячны аклад :: Хартыя'97 :: Навiны

Кіраўніцтва Нацыянальнай акадэміі навук Беларусі (НАНБ) рэкамендавала супрацоўнікам акадэміі ахвяраваць месячны службовы аклад на будаўніцтва Нацыянальнай бібліятэкі. Пра гэта гаворыцца ў пастанове “Аб арганізацыі грамадзкага руху па збору сродкаў на будаўніцтва будынка Нацыянальнай бібліятэкі Беларусі”, прынятым Бюро прэзыдуюму НАНБ.

Кіраўніцтва акадэміі навук, у прыватнасьці, прапануе сваім супрацоўнікам ажыцьцяўляць гэты індывідуальны дабрачынны ўнёсак часткамі або паразава цягам 2002-2003 гадоў на аснове асабістых заяваў. Камэнтуючы дадзеную пастанову па просьбе БелаПАН, віцэ-прэзыдэнт НАНБ Анатоль Лесьніковіч падкрэсьліў, што пералічэньне акладаў супрацоўнікаў акадэміі будзе ажыцьцяўляцца выключна на добраахвотнай аснове. Ніякіх рэпрэсіўных мер да тых, хто адмовіцца зрабіць узьнёсак на будаўніцтва бібліятэкі прымяняцца ня будзе, адзначыў акадэмік. Паводле ягоных словаў, пасіўнасьць некаторых работнікаў будзе кампэнсавацца ўзнёскамі ў будаўніцтва бібліятэкі суб’ектаў навуковай і гаспадарчай дзейнасьці НАНБ. На пачатак кастрычніка такімі суб’ектамі было пералічана 5,5 млн. рублёў, таксама з фонду навуковага й сацыяльнага разьвіцьця НАНБ на будаўніцтва бібліятэкі было выдаткавана 1,5 млн. рублёў. Сам Лесьніковіч напісаў заяву аб пералічэньні свайго аклада яшчэ 26 верасьня, на нарадзе Бюро прэзыдуюму НАНБ аб удзеле акадэміі навук у зборы сродкаў на будаўніцтва Нацыянальнай бібліятэкі Беларусі.