FM на прывязі :: Хартыя'97 :: Навiны

Вядучая навінаў радыё “Юністар” Жана Радзівонава (Яна Каменская) адхіленая ад этыру. Шэф-рэдактар Алег Лепяшэнкаў атрымаў прыстаўку “экс”.

Інфармацыйныя выпускі радыёстанцыяў, якія працуюць у FM-дыяпазоне, -- прадмет асаблівай увагі спэцыялістаў Міністэрства інфармацыі. У самім міністэрстве штотыднёва праводзяцца нарады кіраўнікоў FM-станцыяў, першая зь якіх адбылася 10 верасьня. Повадам для яе стала тое, што некаторыя радыёстанцыі нібыта няправільна асьвяцілі аб’яднаўчы зьезд Беларускага рэспубліканскага саюзу моладзі. Гэтая ж падзея справакавала й скандал на радыё “Юністар” . Адзначым, што 51% статутнага капіталу станцыі належыць БДУ, 49% -- нямецкай кампаніі "Arbо Media Net". Зараз пагроза звальненьня навісла над былым шэф-рэдактарам службы навінаў, якая апошнім часам працавала вядучай навінаў, Жанай Радзівонавай (Янай Каменскай), якая адхіленая ад этыру. Шэф-рэдактар Алег Лепяшэнкаў, які зьмяніў Жану, таксама ім ужо не зьяўляецца.
6 верасьня адбыўся аб’яднаўчы зьезд Беларускага рэспубліканскага саюзу моладзі, на якім прысутнічаў прэзыдэнт краіны. Спэцыфіка мерапрыемстваў з узелам кіраўніка дзяржавы такая, што журналістам трэба зьвяртаццца па адмысловую акрэдытацыю ў прэсавую службу прэзыдэнта ня менш, чым за суткі да іх правядзеньня. Пазаштатны карэспандэнт “Юністар” Кацярына Харына гэтага ня ведала, і ў залю яе не пусьцілі. У выніку ў этыр прайшло паведамленьне наступнага зьместу: “Са скандалу пачаўся сёньня ў Менску аб’яднаўчы зьезд двух буйных моладзевых арганізацыяў...Адміністрацыя прэзыдэнта анулявала акрэдытацыю прадстаўнікам усіх недзяржаўных СМІ... У афіцыйным звароце аб’яднаўчага саюзу да моладзі Беларусі... было заяўлена, што новая арганізацыя ствараецца на прынцыпах дэмакратыі, інфармацыя аб дзейнасьці арганізацыі зьяўляецца даступнай для... шырокай грамадзкасьці”. А ўжо праз гадзіну гэтая навіна стаяла на сайце грамадзянскай ініцыятывы Хартыя’97. У вячэрнем выпуску навінаў Алег Ляпешэнкаў яшчэ і разьвіў гэтую тэму.
Паводле нашай інфармацыі, пасьля нарады ў Мінінфармацыі 10 верасьня на станцыі быў узмоцнены кантроль за зьместам выпускаў навінаў. А 30 верасьня пасьля вяртаньня з адпачынку, Жана Радзівонава даведалася, што адхіленая ад этыру. Дарэчы, Ж.Радзівонава – адна з найбольш дасьведчаных беларускіх FM-журналістаў, якая працавала на радыё “Бі-Эй”, “Альфа-Радыё”, на беларускамоўным “Радыё 101,2”.
Генэральны дырэктар радыё “Юністар” Любоў Ісачкіна пракамэнтавала сытуацыю так: “Мы ня можам займацца тым, на што не атрымалі згоды ні ад нямецкага, ні ад беларускага заснавальніка, адным словам, - палітыкай. Наша станцыя – інфармацыйна-забаўляльная. А Жана выдала ў этыр неправераную інфармацыю, якую яна ўзяла ад пазаштатнага аўтара. А паколькі інфармацыя была прысьвечаная важнай грамадзка-палітычнай падзеі, дый акрамя таго яшчэ памножаная Хартыяй’97, то, натуральна, прыцягнула ўвагу”.
Сапраўды, акрэдытацыя, выдадзеная прадстаўніку інфармацыйнай службы радыё “Юністар” , нікім не адмянялася. Але правілы акрэдытацыі на мерапрыемствы з удзелам прэзыдэнта павінен быў патлумачыць маладому карэспандэнту шэф-рэдактар службы навінаў А.Лепяшэнкаў, і фармальна, Радзівонава ні ў чым не вінаватая. У гендырэктара радыё “Юністар”, зрэшты, іншая думка.
У гэтай неадназначнай сытуацыі мы папрасілі міністра інфармацыі Міхаіла ПАДГАЙНАГА распавесьці, чым абумоўленая неабходнасьць правядзеньня рэгулярных нарад з удзелам кіраўнікоў FM-станцый:
--Сапраўды, вось ужо больш за месяц я зьбіраю дырэктараў сталічных FM-станцый. Я ўвожу іх у курс справы, распавядаю пра тое, што абываецца ў краіне, на што трэба зьвярнуць увагу. Калі мне штосьці не падабаецца ў інфармацыйных выпусках, я пра гэта таксама кажу. Я не надаю гэтаму палітычнага значэньня, у той самы час падкрэсьліваю, што кіраўнікі павінны быць вельмі ўважлівымі да таго, што кажуць у інфармацыйных выпусках. Трэба проста карэктна выкладаць інфармацыю, бо з кожным днём FM-станцыі становяцца ўсё больш папулярнымі, гучаць ва ўсіх аўтамабілях. Між іншым, дырэктары радыёстанцыяў самі скардзіліся мне, шо ў іх ёсьць праблемы з атрыманьнем патрэбнай інфармацыі. Гэтыя праблемы мы таксама вырашаем на нарадах. Зараз інфармацыйная стужка БелТА ёсьць ва ўсіх. Што да навінаў БелаПАН і Інтэрфаксу, то ніхто не забараняў радыёстанцыям карыстацца навінамі гэтых агенцтваў. Але ня трэба забываць, што спэцыфіка ўсіх нашых FM-станцыяў - музычна-забаўляльная. І ня мае значэньня, што нейкія станцыі дзяржаўныя, а нейкія - не. Яны ж усё працуюць у дзяржаве.