У берасьцейскіх шпіталях эканомяць на койка-месцах :: Хартыя'97 :: Навiны

Шпіталі Берасьцейскай вобласьці рэарганізуюцца ў доктарскія амбуляторыі, дзённыя стацыянары, колькасьць койка-месцаў “для ляжачых” у цэнтральных раённых шпіталях можна сьмела скарачаць. Да такога рашэньня прыйшлі ва ўпраўленьні аховы здароўя Берасьцейскай вобласьці пасля аналізу сытуацыі ў шпіталях.

Кантроль за выкарыстаньнем коечнага фонду даў магчымасьць зьнізіць працягласьць шпіталізацыі. За 8 месяцаў гэтага году хворыя правялі ў стацыянары 12,8 дзён, у той час як за адпаведны пэрыяд 2001 году – 13,6 дзён. У 2002 годзе ў мэдычных установах вобласьці за кошт аптымізацыі выкарыстаньня койка-месцаў было сэканомлена 85 мільёнаў рублёў.
Аднак, адзначае “БДГ”, рашэньне мэдычнага кіраўніцтва вобласьці аб скарачэньні койка-месцаў і нават закрыцьці аддзяленьняў у шпіталях прымаецца на фоне пагаршэньня сытуацыі са здароўем насельніцтва. Застаецца складанай дэмаграфічная сытуацыя: нараджальнасьць падае, а сьмяротнасьць расьце. Асноўнымі прычынамі сьмяротнасьці зьяўляюцца хваробы сардэчна-сасудзістай сыстэмы, новаўтварэньні, няшчасныя выпадкі, траўмы і атручваньні. Некалькі зьнізілася ў 2002 годзе толькі сьмяротнасьць сярод дзяцей. У 2002 годзе ў Берасьцейскай вобласьці адзначаецца павелічэньне колькасьці ВІЧ-інфіцыраванных: за 9 месяцаў зарэгістравана 50 чалавек. У той час як летась за гэты ж пэрыяд – 16 чалавек.