КНДР прызналася ў вытворчасьці ядзернай зброі :: Хартыя'97 :: Навiны

У сераду вечарам высокапастаўлены супрацоўнік адміністрацыі ЗША аб’явіў, што Паўночная Карэя прызнала наяўнасьць у сябе сакрэтнай праграмы вытворчасьці ядзернай зброі, паведамляе Associated Press. Таксама прагучала, што Кім Чэн Ір у аднабаковым парадку выходзіць з падпісанага з адміністрацыяй Клінтана пагадненьня аб спыненьні вытворчасьці ядзернай зброі.

Падчас візыту ў Пхеньян з 3 па 5 кастрычніка 2002 году памочнік дзяржсакратара ЗША Джэймс Келі запатрабаваў ад паўночнакарэйскіх ўладаў патлумачыць, як доказы адміністрацыі аб наяўнасьці ў Паўночнай Карэі праграмы абагачэньня ўрану суадносяцца з падпісаным у 1994 годзе пагадненьнем з Клінтанам.
Урад Паўночнай Карэі абвінаваціў адмысловага пасланца Буша ў тым, што ён спрабуе выкарыстоўваць тактыку застрашэньня. Пазьней паўночнакарэйскія ўлады заявілі, што праграма абагачэньня ўрану сапраўды існуе.
У адміністрацыі Буша не паведамілі пра наступныя крокі. Перамовы з паўночнакарэйскімі ўладамі будуць працягвацца.