Заключэньне па “Кальчугах” будзе гатовае дзён праз дзесяць :: Хартыя'97 :: Навiны

Вынікі праверак абгрунтаванасьці абвінавачваньняў Украіны ў пастаўках “Кальчуг” у Ірак, якую праводзяць экспэрты амэрыкана-брытанскай групы, будуць агучаныя ў Лёндане праз 7-10 дзён, заявіў амбасадар ЗША ва Ўкраіне Карлас Паскуаль. У чацьвер у Кіеве ў інтэрвію журналістам амбасадар адзначыў, што на дадзены момант камісія яшчэ працуе. “Яны зьбяруць столькі фактаў, колькі яны здолеюць сабраць. У Лёндане па сканчэньні збору інфармацыі і на яе падставе будзе зроблены даклад. Пасьля чаго будзе прынятае рашэньне, ці патрэбна яшчэ дадатковая інфармацыя”, - сказаў ён і дадаў, што неабходна яшчэ 7-10 дзён, перш чым “будуць высновы”.

Як паведамляе “Інтэрфакс-Украіна”, адказваючы на пытаньне журналістаў аб заяве народнай дэпутаткі Юліі Цімашэнкі аб тым, што ва Ўкраіну была завезеная ўстаноўка “Кальчуга” для дэманстрацыі экспэртам, пасол сказаў: “Я ўпэўнены, што экспэрты выкарыстаюць свае прафэсійныя веды і досьвед, каб высьветліць ці адбылася перадача “Кальчугі”, ці не”.
У сваю чаргу старшыня Дзяржаўнага камітэту па справах аховы дзяржаўнай мяжы Ўкраіны Мікалай Літвін заявіў, што “юрыдычных падставаў для пересячэньня ўкраінска-беларускай мяжы з “Кальчугай” няма”.
Ён патлумачыў, што для перавозкі любога віду зброі з адной краіны ў іншую, у прыватнасьці, ва Ўкраіну, неабходнае міжурадавае пагадненьне, ратыфікаванае парлямэнтам, а такога пагадненьня аб перадачы радарнай сыстэмы паміж Украінай і Беларусяй не было.
Між тым, як паведамляе ІА «Росбалт», прадстаўнікі адмысловай амэрыкана-брытанскай камісіі па расьсьледаваньні абставінаў продажу ў Ірак сыстэмаў зянітнай сочкі “Кальчуга” заявілі сёньня, што Ўкраіна прадстаўляе ўсе неабходныя дакумэнты па пытаньню продажу ў Ірак зброі. Адзін з кіраўнікоў камсііі Алан ван Эгамонд заявіў: “у справе продажу ўкраінскай зброі ў Ірак застаецца цэлы шэраг нявырашаных пытаньняў, адказ на якія пакуль немагчыма атрымаць з-за бытавых перашкодаў на Ўкраіне”.
13 экспэртаў амэрыкана-брытанскай камісіі, якія прадстаўляюць Дзяржаўны дэпартамэнт ЗША, мінаабароны ЗША і Вялікабрытаніі, знаходзяца ва Ўкраіне з 14 кастрычніка. Яны падзеленыя на тры падгрупы: адна працуе ў ваеннай сфэры і яе “апекае” Ўпраўленьне міжнароднага ваеннага супрацоўніцтва Цэнтру верыфікацыі і ваеннага супрацоўніцтва Генштабу УС Украіны, другая – у палітычнай сфэры, кантактуючы з Адміністрацыяй прэзыдэнта Ўкраіны, МЗС, Радай нацыянальнай бясьпекі і абароны. Трэцяя падгрупа ў сваім складзе мае спэцыялістаў, якія будуць кантактаваць з “Укрспецэкспортом” і абароннымі прадпрыемствамі. Чакаецца, што экспэрты завершаць працу 19 кастрычніка.