На Берасьцейшчыне пазыкі па заробку пераўзышлі 19 мільярдаў рублёў :: Хартыя'97 :: Навiны

Запазычанасьць па заробку ў Берасьцейскай вобласьці, паводле апошніх дадзеных, склала 19,1 мільярды рублёў. Як адзначаюць у абласным Камітэце дзяржкантролю, назіраецца ўстойлівая тэндэнцыя росту запазычанасьці: калі на 1 сьнежня 2001 году яе памер складаў 7,8 мільярда, то на 1 сакавіка 2002 – 10 мільярдаў, а на 1 кастрычніка 2002 – 19,1 мільярда рублёў.

Як паведамляе БелаПАН, найбольшыя пазыкі па заробку -- у сельскай гаспадарцы. На долю калгасаў і саўгасаў прыпадае 14,7 мільярды - гэта ў два разы болей за леташні паказчык. У 3,9 разы павялічылася запазычанасьць на прамысловых прадпрыемствах вобласьці. Колькасьць суб’етаў гаспадараньня – даўжнікоў па заробку - апошнім годам павялічылася з 365 да 445. Сталыя праблемы з выплатамі заробкаў ёсьць на ААТ “Палесьсе” (Пінск), “Палесьеэлектрамаш” (Лунінец), ААТ “Баранавіцкі завод станкапрыладаў” і іншых прадпрыемствах.
Найболшую запазычанасьць маюць прадпрыемствы й гаспадаркі Лунінецкага, Іванаўскага, Столінскага, Пінскага й Драгічанскага раёнаў вабласьці.
У выніку праверак па выплаце заробку КДК у шэрагу раёнаў да адміністратыўнай адказнасьці прыцягнутыя 56 кіраўнікоў гаспадарак; яны аштрафаваныя на агульную суму ў 1,4 мільёны рублёў. Абласным упраўленьнем Дэпартамэнту інспэкцыі працы праведзена больш за дзьве тысячы праверак выплаты заробку. За невыкананьне заканадаўства аб працы выдана больш за 2 тысячы прадпісаньняў, аштрафавана 469 службовых асоб на суму 4 мільёны, да 630 наймальнікаў былі прымененыя санкцыі на суму 5,5 мільёны, 1.336 наймальнікаў атрымалі пісьмовыя папярэджаньні.