У Дзярждуме пройдуць слуханьні па праблеме беларуска-расейскай інтэграцыі :: Хартыя'97 :: Навiны

12 лістапада ў Дзяржаўнай думе плянуецца правесьці парлямэнцкія слуханьні па праблеме беларуска-расейскай інтэграцыі. Падрыхтоўкай слуханьняў на дадзены час займаецца парлямэнцкая фракцыя “Союз правых сил”. Пра гэта БелаПАН паведаміў старшыня Аб’яднанай грамадзянскай партыі (АГП) Анатоль Лябедзька. Паводле словаў палітыка, у рамках гэтых слуханьняў будзе абавязкова ўзьнятае пытаньне аб зьніклых беларускіх палітыках.

Слуханьням у Дзярждуме будуць папярэднічаць канфэрэнцыя па праблемах пабудовы беларуска-расейскага саюзу, якая, як ужо паведамляў БелаПАН, пройдзе 23 кастрычніка ў Менску. Для ўдзелу ў гэтым мерапрыемстве ў Беларусь прыбудзе група дэпутатаў ад СПС. Сярод іх – віцэ-сьпікер Дзярждумы Ірына Хакамада й кіраўнік фракцыі СПС Барыс Нямцоў. Зь ініцыятывай правядзеньня канфэрэнцыі выступіла АГП пры падтрымцы аналітычнага цэнтру “Стратэгія”. У агуле удзел у канфэрэнцыі прымуць каля 80 беларускіх і расейскіх палітыкаў, навукоўцаў і грамадзкіх дзеячоў.

Неабходна адзначыць, што правядзеньне ў Менску канфэрэнцыі па пытаньнях аб’яднаньня з Расеяй ужо выклікала негатыўную рэакцыю з боку Маладога Фронту. Актывісты арганізацыі маюць намер правесьці ля будынку Менскага міжнароднага адукацыйнага цэнтру, дзе будзе праходзіць паседжаньне, пікет у абарону сувэрэнітэту Беларусі.