Чыноўнікаў Менгарвыканкаму прымушаюць чытаць :: Хартыя'97 :: Навiны

Кіраўнік камітэту, упраўленьня ці аддзелу Менгарвыканкаму, які не адказаў у час на пісьмовыя звароты грамадзян, будзе пазбаўлены прэміі. Адпаведныя зьмены ў бліжэйшы час плянуецца ўнесьці ў палажэньне аб прэміяраваньні, адзначыў 21 кастрычніка на апэратыўнай нарадзе ў Менгарвыканкаме мэр сталіцы Міхаіл Паўлаў. У 2002 годзе такіх кіраўнікоў, якія больш за патрэбнае трымалі 15 лістоў гараджан “пад сукняй” набралася трое, распавяла калегам начальнік аддзелу ліставаньня і арганізацыі прыёму грамадзян Менгарвыканкаму Галіна Ярамцова.

Паводле ейных словаў, з пачатку сёлетняга году мэрыя атрымала каля 6 тысяч пасланьняў гараджан. Гэта на 30 адсоткаў меней, чым год таму. Кожны трэці ліст на кантролі ў адпаведных муніцыпальных служб, а па 19 адсотках зь іх прынятыя станоўчыя рашэньні. Значна радзей менчукоў сталі цікавіць пытаньні землекарыстаньня, будаўніцтва жыльля, атрыманьня крэдытаў і субсыдыяў, менш скардзіліся яны на якасьць рамонту жылых дамоў і на працу транспарту. Затое павялічылася колькасьць пытаньняў ад прадпрымальнікаў і камэрцыйных структур.
З адкрыцьцём сваёй старонкі ва ўсясьсьветным сеціве інтэрнэт мэрыя сутыкнулася яшчэ з адной праблемай: адказваць на пытаньні тых, хто накіроўвае свае пасланьні па адрасу www.minsk.gov.by.
www.minsk.gov.by.