На думку Аляксандра Лукашэнкі, інцыдэнт з высылкай з тэрыторыі краіны лідэраў расейскай партыі СПС Барыса Нямцова і Ірыны Хакамады, ніяк не паўплывае на беларуска-расейскія адносіны, паведамляе агенцтва "Интерфакс". “У нас никогда не было проблем с гражданами России, которые приезжают к нам как братья. Что касается Немцова, компетентные органы республики знали о том, что это произойдет и знали, кому предназначались деньги и литература”, -- заявіў Лукашэнка ў час наведваньня лідзкага памежнага атраду.

---

Зінаіда Ганчар занесла ў пракуратуру вопратку свайго мужа для правядзеньня геномнай экспэртызы. Гэтая экспэртыза павінна канчаткова высьветліць, ці належаць Віктару Ганчару рэчыўныя фрагмэнты, якія былі знойдзеныя на месцы яго зьнікненьня 16 верасьня 1999 году.

---

У бліжэйшы час адбудзецца паседжаньне адмысловай камісіі па расьсьледаваньні зьнікненьняў беларускіх палітыкаў, якая была створаная падчас верасьнёўскай сэсіі ПАРЭ ў Стразбургу. Сутрэча пройдзе ў Парыжы ў рамках паседжаньня юрыдычнага камітэту ПАРЭ. Затым парлямэнтары зьбіраюцца прыехаць у Беларусь. Магчыма таму і заварушылася “палата прадстаўнікоў”, і вырашыла ў якія та часы загаварыць сёньня пра зьніклых ня шэптам, а ў Авальнай залі.

---

Міждзяржаўная фінансава-прамысловая група “Беларусаўта” мае намер наладзіць пастаўкі беларускай аўтатэхнікі ў Ірак, паведаміў "Интерфаксу" дырэктар беларускага аддзялення ФПГ Ігар Авяркіеў. Зь ягоных словаў, зараз зарэгістраванае прадстаўніцтва “Беларусаўта” ў Багдадзе, пачаліся перамовы з зацікаўленымі міністэрствамі й ведамствамі Іраку, а такама вядзецца прыём заявак на набыцьцё беларускай тэхнікі.

---

Слуханьні па справе члена верхняй “палаты” беларускага “парлямэнту” былога начальніка Беларускай чыгункі Віктара Рахманько пройдуць у Вярхоўным судзе рэспублікі 14 лістапада. Пра гэта, выступаючы на сэсіі Савету рэспублікі, паведаміў “Медиафакту” намесьнік генэральнага пракурора рэспублікі Віктар Прус.

---

20 сьнежня 2000 году расейскія шпіёны адзначылі свой дзень народзінаў з помпай, якой ніхто ня бачыў з часоў Юры Андропава (якога, дарэчы, горача любіць цяперашні прэзыдэнт). У той год гаспадаром Крамля стаў іх чалавек – Уладзімер Пуцін. Адлік сваёй гісторыі супрацоўнікі органаў дзяржбясьпекі пачынаюць з 1917 году, калі была ўтвораная Надзвычайная Камісія па барацьбе з контррэвалюцыянэрамі, сабатажнікамі і спэкулянтамі. Ці, скарочана, -- ЧК, якая пазьней атрымала назоў ОГПУ, НКВД і КГБ. Калі Савецкі Саюз развальваўся на часткі, КГБ падзяліўся на чатыры арганізацыі. Найбольш уплывовыя зь якіх – СВР (Служба замежнай выведкі), і ФСБ (Федэральная Служба бясьпекі). Былы прэм’ер-міністар Яўген Прымакоў некалі ачольваў перашае з гэтых ведамстваў. Уладзімер Пуцін – другое: да таго часу, пакуль у 1999 годзе Барыс Ельцын ня ўвёў яго ў склад ураду.

---

Беларусь можа застацца за бортам стратэгічных інтарэсаў Расеі ў галіне экспартных паставак прыроднага газу ў Эўропу. 7 кастрычніка Расея і Ўкраіна падпісалі пагадненьне аб стварэньні міжнароднага газавага кансорцыюму па разьвіцьці газатранспартных сетак. Тым самым у барацьбе за расейскую “трубу” вызначыўся новы фаварыт. А беларускі бок, які таксама мае сур’ёзныя віды на ўдзел у расейскім газавым экспарце, павінен задумацца аб новых рэаліях у адносінах да ўсходняй суседкі.

---

Вучаніца пятай клясы Марыя Каралькова з гораду Горкі (Магілёўская вобласьць) два месяцы ня ходзіць у школу, патрабуючы даць ёй магчымасьць навучацца на беларускай мове.

---

У другім кварталі сёлетняга году бюджэт пражытачнага мінімуму склаў 78 536 рублёў на чалавека ў месяц. Паводле словаў спэцыялістаў Міністэрства статыстыкі і аналізу, 6,1% насельніцтва краіны мае даходы ніжэй за 45 000 рублёў на аднаго чалавека.

---

Міністэрства эканомікі з 24 кастрычніка сёлетняга году павысіла на 5 адсоткаў адпускныя кошты на цукар-пясок, які выраблены ці рэалізоўваецца на тэрыторыі Рэспублікі Беларусь усімі юрыдычнымі асобамі і індывідуальнымі прадпрымальнікамі, незалежна ад падпарадкаванасьці і формаў уласнасьці.

---

У 15 гаспадарках Віцебскай вобласьці ўстаноўленыя факты скажэньня справаздачных дадзеных аб валавым зборы зерня і ўраджайнасьці зерневых і зернебабовых.

---

Страшныя падзеі ў Маскве, што разгортваюцца зараз ля будынку Дома культуры, дзе ў закладніках апынуліся больш за 700 чалавек, сярод якіх таксама прысутнічаюць грамадзяне Беларусі, мы папрасілі пракамэнтаваць вядомага беларускага кінарэжысёра Юр’я Хашчавацкага, які як раз завяршыў здымкі дакумэнтальнага фільму пра вайну ў Чачэніі “Каўказскія палонныя”. “Каўказскія палонныя” – фільмы пра тое, як мяняецца жыцьцё людзей падчас вайны. “Я заўважыў, што вельмі многія людзі ставіліся да вайны зь цікаўнасьцю. Маркотнае, жабрацкае жыцьцё прывяло іх та таго, што яны палічылі, што вайна можа зьмяніць іх жыцьцё. Сёньня важна зразумець, -- кажа рэжысёр, -- які гэта жах - вайна, якімі небясьпечнымі становяцца людзі. Зьвярэюць усе -- і чачэнскія баевікі, і расейская армія. І гэтае зьверства зараз выліваецца ў грамадзтва”.

---

Амбасада Беларусі ў Расеі не называе прозьвішчы беларускіх закладнікаў Ўладзімер Грыгор’еў паведаміў «Інтэрфаксу», што амбасада ведае прозьвішчы шасьці грамадзян нашай рэспублікі, якія, паводле прапановаў, знаходзяцца ў будынку Дому культуры. Разам з тым Грыгор’еў заявіў, што дыпляматы наўмысна пакуль не агучваюць гэтыя прозьвішчы з тым, каб не хваляваць блізкіх і сваякоў беларускіх грамадзян “раней часу”. Амбасадар патлумачыў, што зьвесткі, якія трапілі ў рукі дыпмісіі не зьяўляюцца афіцыйна пацьверджанымі. Існуе верагоднасьць таго, што дадзеныя зьвесткі не пацьвердзяцца, адзначыў Грыгор’еў.

---

Сярод захопленых у Маскве закладнікаў, паводле папярэдніх дадзеных, знаходзіцца шэсьць грамадзян Беларусі. Пра гэта паведаміў Надзвычайны і Паўнамоцны Амбасадар Беларусі ў Расеі Ўладзімер Грыгор’еў, які выехаў на месца, дзе разыгралася трагедыя. Дадзеная інфармацыя маецца сыходзячы з кантактаў са сваякамі і тэлефонных зваротаў у амбасаду Беларусі ў Маскве. Афіцыйнага пацьверджаньня згаданай інфармацыі на дадзены час няма.

---

Ажыцьцявілася чаканая мара Аляксандра Рыгоравіча Лукашэнкі. Нарэшце давялося яму прадэманстраваць сваю прэзыдэнцкую моц не на ўсялякіх там беларускіх журналістах, амэрыканскіх амбасадарах і эўрапейскіх прадстаўніках, а на высокапастаўленых гасьцях з самай блізкай, самай саюзьніцкай і самай неабходнай яму краіны -- адным словам, з Расеі.

---

“23 кастрычніка с.г. а 7.00 з Масквы ў дзяжурны Камітэт дзяржбясьпекі паступіў тэлефонны званок аб тым, што рэйсам №1983 з Масквы ў Менск выляцеў старшыня "Саюзу правых сілаў" Расеі Барыс Нямцоў, які вязе пры сабе буйную суму грошай для беларускай апазыцыі й літаратуру, накіраваную на дэстабілізацыю грамадзка-палітычнай абстаноўкі ў Беларусі. Прынятымі КДБ мерамі грошы ў памеры больш за 50 тысяч даляраў ЗША й літаратура былі выяўленыя і канфіскаваныя ў Барыса Нямцова”, -- заявіў у інтэрвію Першаму нацыянальнаму каналу прэсавы сакратар беларускага замежнапалітычнага ведамства Павел Латушка.

---

«Газета.Ru» разабралася, якім чынам і за якія грахі дэпутатаў Нямцова і Хакамаду дэпартавалі зь Беларусі. Па-першае, высьвятлілася, што беларускі КДБ парушыў саюзную дамову, па-другое, што ад турмы Нямцова ўратавала Хакамада, якая забараніла яму дакранацца да $50 тыс., нарэшце, што дэпутаты вярнуліся без квіткоў, але іх цэлы дзень не кармілі.

---

Учора перад будынкам менскага Міжнароднага адукацыйнага цэнтру, дзе праходзіла канфэрэнцыя па праблемах новай беларуска-расейскай інтэграцыі, быў арганізаваны пікет праціўнікаў аб’яднаньня з Расеяй. Пікет наладзілі актывісты Маладога Фронту й Беларускай партыі свабоды. Міліцыя затрымала пяцёх найбольш актыўных яго ўдзельнікаў, у тым ліку лідэра Маладога Фронту Паўла Севярынца. Пікетоўцы, як паведамляе Радыё Свабода, выказалі сваю незадаволенасьць тым, што беларуская апазыцыя дамаўляецца зь лідэрамі расейскага "Саюзу правых сілаў" аб варыянтах новай інтэграцыі з Расеяй.

---

Міжнародная журналісцкая арганізацыя “«Рэпарцёры бязь межаў” публікуюць першы даклад па свабодзе прэсы ў сьвеце. Беларусь па індэксу свабоды прэсы ў гэтым сьпісе займае адно з самых апошніх месцаў – 124 месца са 139 магчымых. Пасьля Беларусі ідуць толькі Паўночная Карэя, Ірак, Сырыя, Кітай, Бірма, Туркмэністан і Бутан, Лібія, Ляос, Туніс, Вьетнам і Саўдаўская Аравія.

---

Затрыманьне і высылка зь Беларусі Барыса Нямцова і Ірыны Хакамады - абраза для ўсёй Расеі, заявіў учора намесьнік кіраўніка фракцыі “Единство” Ўладзіслаў Рэзьнік, выказваючы думку сваёй фракцыі ў сувязі з сёньняшнім інцыдэнтам у Менску. Паводле ягоных словаў, такія дзеяньні з боку Беларусі “ўдвая непрыемныя, бо абраза была нанесеная дзяржавай, якую мы лічым партнёрам і саюзьнікам”.

---

Дзяржсакратар Саюзнае дзяржавы Расеі й Беларусі Павел Барадзін устрымліваецца ад камэнтараў адносна інцыдэнта зь віцэ-сьпікерам Дзярждумы Ірынай Хакамадай і лідэрам фракцыі СПС Барысам Нямцовым да таго часу, пакуль не атрымае афіцыйнага заключэньня аб незаконнасьці іх высылкі са сталіцы Беларусі. Пра гэта заявіў прэсавы сакратар Паўла Барадзіна Іван Макушок. Ён падкрэсьліў, што дзяржсакратар сочыць за разьвіцьцём падзеяў.

---

Амбасада РФ У Менску апрацоўвае і аналізуе ўсю інфармацыю, датычную высылкі лідэра "Саюзу правых сілаў" Барыса Нямцова і рыхтуецца паведаміць пра сытуацыю кіраўніцтву МЗС Расеі, паведаміў "Интерфаксу" ў сераду прадстаўнік расейскай дыпмісіі.

---

Як заявіў у прамым этыры тэлеканалу “Россия” пасол Аўстрыі, тэрарысты перадалі яму па тэлефоне, што нібыта маюць намер выдаць прадстаўнікам дыпмісіяў грамадзян іх краін. Згодна паведамленьню інфармацыйнага агенцтва "Интерфакс", аўстрыйскі пасол ня змог назваць дакладную колькасьць замежнікаў, якія знаходзяцца ў закладніках. Па зьвестках тэлеканалу “Россия”, у будынку тэатральнага цэнтру знаходзіцца каля 20 замежнікаў. Аднак, як паведаміла ў этыры радыёстанцыі “Эхо Москвы” адна з вызваленых закладнікаў Марыя Школьнікава, сярод закладнікаў знаходзяцца грамадзяне наступных дзяржаваў: Беларусі, Нідэрляндаў, Баўгарыі, Канады, Аўстраліі, Латвіі, Малдовы, Югаславіі, Туркмэніі, Азэрбайджану, Армэніі, Грузіі, ЗША, Нямеччыны, Вялікабрытаніі, Швайцарыі, Украіны.

---