Амбасада РФ у Менску аналізуе сытуацыю з выгнаньнем Нямцова :: Хартыя'97 :: Навiны

Амбасада РФ У Менску апрацоўвае і аналізуе ўсю інфармацыю, датычную высылкі лідэра "Саюзу правых сілаў" Барыса Нямцова і рыхтуецца паведаміць пра сытуацыю кіраўніцтву МЗС Расеі, паведаміў "Интерфаксу" ў сераду прадстаўнік расейскай дыпмісіі.

Ён адзначыў, што ў амбасадзе даведаліся аб інцыдэнце з Б.Нямцовым ад адмысловага прадстаўніка ФСБ у Беларусі, які патэлефанаваў і паведаміў аб выгнаньні расейскага парлямэнтара.
Суразмоўца агенцтва патлумачыў, што амбасада не была папярэдне праінфармаваная аб візыце ў Беларусь лідэраў СПС, менавіта таму ніхто з прадстаўнікоў дыпмісіі не прыбыў сустракаць гасьцей у аэрапорт.
Ён паведаміў таксама, што амбасадар Расеі ў Беларусі Аляксандар Блохін у гэты час знаходзіўся ў горадзе Ліда (Гарадзенская вобласьць), дзе праходзіць сумесная калегія памежнага ведамства дзьвюх краін. Ён быў праінфармаваны аб здарэньні і тэрмінова выехаў у Менск.
Лідэры СПС Барыс Нямцоў і Ірына Хакамада былі высланыя ў сераду зь Беларусі, куды яны прыбылі на Міжнародную канфэрэнцыю “Беларусь-Расея: новая інтэграцыя?”, наладжаную апазыцыяй.
Нямцоў і Хакамада былі затрыманыя адразу пасьля прылёту ў аэрапорт Менску супрацоўнікамі беларускіх спэцслужбаў. Іх адрэзалі ад журналістаў, пасадзілі ў машыну і адвезьлі ва ўрадавы аэрапорт "Менск-1", дзе пасадзілі на самалёт і адправілі назад у Расею.