Барыс Нямцоў будзе судзіцца зь беларускімі ўладамі :: Хартыя'97 :: Навiны

У справе дэпартацыі з краіны беларускімі спэцслужбамі лідэра фракцыі СПС расейскай Дзярждумы Барыса Нямцова пакуль рана ставіць кропку. Барыс Яфімавіч зьбіраецца зьвярнуцца ў беларускі суд. Ён лічыць, што ягоныя правы былі парушаныя.

Сваё выгнаньне зь Беларусі, а таксама вымушаны ад’езд віцэ-сьпікера Думы Ірыны Хакамады й дырэктара вышэйшай палітычнай школы ў Маскве Сяргея Маркава, Барыс Нямцоў расцэньвае як бязладзьдзе беларускіх уладаў, і зварот у суд лічыць пытаньнем прынцыповым, паведамляе прэсавая служба Аб’яднанай грамадзянскай партыі. Расейскі палітык мае намер праз судовае разьбіральніцтва прыцягнуць увагу грамадзкасьці Беларусі й Расеі да жахлівых парушэньняў высокапастаўленымі чыноўнікамі правоў грамадзян як самой Беларусі, так і прадстаўнікоў іншай краіны. Зараз рыхтуюцца неабходныя дакумэнты для звароту ў суд. Вырашаецца пытаньне, хто будзе прадстаўляць інтарэсы Барыса Нямцова ў Беларусі.