У Фінляндыі “вывелі” ідэальнага студэнта для Беларусі :: Хартыя'97 :: Навiны

Цікавую акцыю правялі актывісты Гэльсынскага аддзяленьня праваабарончай арганізацыі “Міжнародная амністыя”, каб прыцягнуць увагу да парушэньняў правоў чалавека ў Беларусі. У панядзелак, у разгар навучальнага дня ва ўнівэрсітэцкім двары ў Гэльсынкі на парце стала дзяўчына з завязаным ротам. Усім, хто зацікавіўся гэтым гледзішчам, а іх было больш за дзьвесьце чалавек, другія актывісты раздавалі ўлёткі. Ва ўлётках тлумачылася, што гэтая дзяўчына прадстаўляе ідэальнага студэнта з пункту погляду беларускага ўраду, бо яна ня можа выказваць сваю думку.

Пасьля гэтага студэнты-праваабаронцы пачалі зьбіраць подпісы пад зваротам да Аляксандра Лукашэнкі з патрабаваньнем спыніць сыстэмныя парушэньні правоў чалавека й свабоды слова. Было сабрана каля ста подпісаў. Ліст быў адпраўлены ў бліжэйшую амбасаду Беларусі, якая знаходзіцца ў Латвіі.
А пачынаючы з пятніцы, маладыя праваабаронцы распаўсюджвалі па ўнівэрсытэцкіх інтэрнатах улёткі з лягатыпам руху ЗУБР і пытаньнямі: “Чаму “зубры” ў небясьпецы ў Беларусі?”, “Чаму зубры ня могуць казаць?”, “Чаму зубры аб’яўляюць галадоўку?”. Інфармацыя пра гэтую акцыю прайшла па мясцовай тэлевізіі.
Бліжэйшым часам, для прыцягненьня ўвагі грамадзкасьці да сытуацыі з правамі чалавека ў Беларусі, актывісты “Міжнароднай Амністыі” ў Фінляндыі, Нямеччыне, Швайцарыі і іншых краінах рыхтуюць акцыі і публікацыі ў СМІ.