Здароўе нацыі значна пагоршылася :: Хартыя'97 :: Навiны

За апошнія 10 гадоў у Беларуі пагоршыўся стан здароўя насельніцтва па асноўных паказчыках, паведаміў прэзыдэнт Беларускай асацыяцыі сацыял-гігіеністаў і арганізатараў аховы здароўя Мар’ян Івашкевіч.

Так, першасная захворваемасьць вырасла на 20 адсоткаў, у тым ліку злаякасныя ўтварэньні – на 18 адсоткаў, хваробы сыстэмы крывазвароту – на 60 адсоткаў, нэрвовай сыстэмы і органаў пачуцьця – на 40 адсоткаў, псыхічныя разладжваньні – на 34 адсоткі, перадае БелаПАН. За гэты пэрыяд таксама зьнізіўся паказчык чаканай працягласьці жыцьця з 70,7 да 68,5 году. Акрамя таго, сур’ёзнай дэмаграфічнай праблемай для краіны стаў рост сьмяротнасьці насельніцтва. За апошнія 20 гадоў яна вырасла ў два разы за кошт павелічэньня сьмяротнасьці ва ўсіх узроставых групах і асабліва сярод мужчын працаздольнага ўзросту. Акрамя таго, па словах В.Івашкевіча, з 1993 году ў Беларусі ўпершыню назіраецца зьніжэньне абсалютнай колькасьці насельніцтва, што выклікана рэзкім зьніжэньнем нараджальнасьці й ростам сьмяротнасьці. Разам з тым на дадзены момант у краіне некалькі палепшыліся й стабілізаваліся паказчыкі нараджальнасьці: у 2000-2001 гадах быў зарэгістарваны самы нізкі паказчык дзіцячай сьмяротнасьці сярод краін СНД – 9,3 – 9,1 на тысячу наванароджаных.