Аксане Новікавай прад’яўлена абвінавачваньне ў паклёпе на Лукашэнку :: Хартыя'97 :: Навiны

Сьледчы пракуратуры Цэнтральнага раёну Менску Максім Падзярэй 28 кастрычніка прад’явіў 29-гадовай Аксане Новікавай абвінавачваньне ў злачынстве, прадугледжаным часткай 2 арт.367 КК Рэспублікі Беларусь (паклёп адносна Прэзыдэнта Рэспублікі Беларусь, разам з абвінавачваньнем у зьдзяйсьненьні цяжкага ці асабліва цяжкага злачынства). Паводле гэтага артыкула Новікавай пагражае пакараньне ў выглядзе абмежаваньня волі на тэрмін да пяці гадоў ці пазбаўленьне волі на той самы тэрмін.

У пастанове, уручанай абвінавачанай, гаворыцца, што Аксана Новікава 17 кастрычніка 2002 году, а 9 гадзіне 10 хвілінаў ля падземнага пераходу ля дому №23 па праспэкту Ф.Скарыны ў Менску “раздавала мінакам улёткі ўласнага вырабу, выкананыя друкаваным чынам”. У іх утрымліваўся “паклёп адносна Прэзыдэнта Рэспублікі Беларусь, злучаны з абвінавачваньнем у зьдзяйсьненьні асабліва цяжкіх злачынстваў, сярод якіх садзеяньне ў забойстве двух і болей асоб праз выкраданьне чалавека, захопе і ўтрыманьні ўлады неканстытуцыйным шляхам”.
У інтэрвію БелаПАН Аксана Новікава адзначыла, што распаўсюджваючы ўлёткі, яна хацела прыцягнуць увагу грамадзкасьці да сытуацыі ў краіне і да дзеяньняў вышэйшага кіраўніцтва краіны. Акрамя таго, адзначыла Новікава, сваёй акцыяй яна выступала за адмену недэмакратычных, на яе думку, артыкулаў крымінальнага кодэксу – 367 (паклёп адносна Прэзыдэнта Рэспублікі Беларусь), 368 (абраза Прэзыдэнта Рэспублікі Беларусь) і 369 (абраза прадстаўніка ўлады).
Паводле Новікавай, сьледчы мяркуе, што сьледзтва будзе завершана значна раней за вызначаны пракурорам тэрмін у паўтара месяца. Абаронцам па справе прызначаны адвакат Менскай гарадзкой калегіі адвакатаў Сяргей Паўлавец.