Менчукі адзначаюць у Беларусі рост коштаў і карупцыі :: Хартыя'97 :: Навiны

Падчас чарговага апытаньня грамадзкае думкі, праведзенай сярод 500 менчукоў 18 гадоў і старэй сацыялягічнай службай “Зеркало” інфармацыйнай кампаніі БелаПАН 22-25 кастрычніка, увазе жыхароў беларускай сталіцы прапанавалі сьпіс сацыяльных зьяваў. Рэспандэнтаў прасілі ўказаць, якія з гэтых зьяваў маюць месца ў Беларусі. Большасьць апытаных сацыолягамі жыхароў беларускай сталіцы зьвярнулі ўвагу на рост коштаў (70 адсоткаў) і рост беспрацоўя (52 адсоткі). Каля паловы – 49 адсоткаў – адзначылі наяўнасьць у кране “карупцыі, хабарніцтва сярод чынрўнікаў мясцовай улады”.

Меншая колькасьць рэспандэнтаў паказала на такія зьявы, як “раскраданьне дзяржаўнай, калгаснай уласнасьці” (46 адсоткаў) і “парушэньне правоў чалавека” (44 адсоткі). Па 42 адсоткі апытаных зьвярнулі ўвагу на “карупцю, хабарніцтва ў вышэйшым кіраўніцтве краіны”, а таксама на “падман насельніцтва Беларусі з боку прадстаўнікоў уладаў”. 41 адсотак менчкоў адзначылі рост злачыннасьці. Каля траціны – 32 адсоткі рэспандэнтаў - адзначылі судовы перасьлед па палітычных матывах, а 23 адсоткі – пагрозу жыцьця апазыцыйным палітыкам.
Значна меншая колькасьць жыхароў беларускай сталіцы лічаць, што ў Беларусі існуюць такія зьявы, як падрыўная дзейнасьць заходніх спэцслужб (15 адсоткаў) і перашкоды дзейнасьці А.Лукашэнкі з боку апазыцыі (14 адсоткаў). Па 9 адсоткаў апытаных згадалі на перашкоды дзейнасьці А.Лукашэнкі з боку чыноўнікаў, мясцовых уладаў, а таксама “небясьпечнасьць замовы супраць А.Лукашэнкі”.