У Менску пачаўся суд па прызнаньні Анатоля Красоўскага без вестак зьніклым :: Хартыя'97 :: Навiны

Сёньня а 10.00 у Фрунзенскім судзе Менску пад старшынствам судзьдзі Кулаковай пачалося судовае паседжаньне, на якім разглядаецца заява Ірыны Красоўскай па прызнаньні ейнага мужа Анатоля Красоўскага без вестак адсутным. У час суда прадстаўнік Красоўскай Гары Паганяйла высоўваў шэраг хадайніцтваў, у тым ліку аб далучэньні да матэрыялаў суда шэрагу дакумэнтаў, якія пацьвярджаюць датычнасьць уладаў да зьнікненьня Анатоля Красоўскага і ягонага сябра, вядомага апазыцыйнага палітыка Віктара Ганчара. Меўся на ўвазе рапарт начальніка ДУКМ ГУУС генэрал-маёра міліцыі Мікалая Лапаціка, рапарт начальніка СІЗА палкоўніка Алега Алкаева, ксэракопія раскладу выдачы “расстрэльнага” пісталету і г.д. Аднак гэтае хадайніцтва было адхіленае.

Таксама было адхіленым хадайніцтва аб выкліку ў суд у якасьці сьведак міністра ўнутраных справаў Беларусі Ўладзімера Навумава, былога кіраўніка сьледчай групы, намесьніка кіраўніка сьледчага аддзелу Пракуратуры РБ Івана Бранчэля, камандзіра САХРу Зьмітра Паўлічэнкі, намесьніка кіраўніка Адміністрацыі прэзыдэнта Юры Сівакова.
З усіх высунутых хадайніцтваў, судзьдзя задаволіў толькі хадайніцтва аб запыце ў сьледчага пракуратуры Ўладзімера Чумачэнкі інфармацыі аб вядзеньні сьледзтва па справе аб зьнікненьні Анатоля Красоўскага.
Суд працягне сваю працу пасьля 20 лістапада.