Новы Закон “Аб СМІ” будзе разглядацца на цяперашняй сэсіі “парлямэнту” :: Хартыя'97 :: Навiны

Законапраект “Аб сродках масавай інфармацыі”, які знаходзіцца на дадзены момант у адміністрацыі прэзыдэнта, хутчэй за ўсё будзе разглядацца дэпутатамі “палаты прадстаўнікоў” падчас цяперашняй сэсіі. Такое меркаваньне ў інтэрвію “Медиафакту” ў сераду выказаў кіраўнік “парлямэнцкай” камісіі па правох чалавека, нацыянальных дачыненьнях і СМІ Валеры Ліпкін.

Паводле ягоных словаў, дадзены законапраект будзе вынесены на “шырокае абмеркаваньне”. Акрамя таго, В.Ліпкін ня выключыў, што праект закону “Аб СМІ” будзе накіраваны на экспэртызу ў Раду Эўропы.
Згодна папярэдняй інфармацыі, паводле словаў парлямэнтара, у законапраекце “Аб сродках масавай інфармацыі” прадугледжана такая “інфармацыйная ніша як Інтэрнэт і іншыя інфармацыйныя носьбіты”. Разам з тым мяркуецца, што Інтэрнэт будзе “вызначаны ў законе як адзін з накірункаў інфармацыйнай дзейнасцьі”. Больш глыбака гэтая тэма будзе адлюстравана ў праекце закону, які рыхтуецца да разгляду ў наступным годзе, датычнага пытаньняў інфармацыйнай бясьпекі, паведаміў В.Ліпкін.
Кіраўнік дэпутацкай камісіі ня здолеў адказаць на пытаньне, датычнае правамернасьці прыцягнеьня да адміністратыўнай адказнасьці тых, хто распаўсюджвае ў сетцы Інтэрнэт закрытыю газэту “Пагоня”. Між тым, паводле яго, “у нейкай ступені можа быць пакараны чалавек, які праз Інтэрнэт распаўсюдзіў інфармацыю абразьлівага характару, і якая вядзе да распальваньня рэлігійнай, міжнацыянальнай розьні”. “Але ў дадзеным выпадку павінна быць устаноўлена крыніца інфармацыі, пацьверджана аўтарства той ці іншай асобы”, - сказаў В.Ліпкін.
Як раней паведамлялася, гарадзенская абласная пракуратура накіравала ў Ленінскі РАУС гораду Горадні ліст з патрабаваньнем “вырашыць пытаньне прыцягненьня да адміністратыўнай адказнасьці” тых, хто распаўсюджвае ў сеціве закрытую газэту “Пагоня”. Адзін з журналістаў у сувязі з гэтым ужо даваў тлумачэньні ў міліцыі.
У міліцыю выклікалі журналістку Ірыну Чарняўку, у якой “узялі пісьмовае тлумачэньне адносна яе дзейнасцьі”, паведамляецца на сайце газэты “Пагоня”. У матэрыялах справы фігурыруюць раздрукоўка сайту газэты “Пагоня” за верасень сёлетняга году, а таксама сьпіс, які назваўся “рэдакцыя інтэрнэт-газэты “Пагоня”, з адрэсамі й тэлефонамі гарадзенскіх журналістаў.