“Царскі” падарунак студэнтам :: Хартыя'97 :: Навiны

Бліжэйшым часам у студэнтаў беларускіх вну, а таксама ў навучэнцаў сярэдніх спэцыяльных і прафэсійна-тэхнічных установаў павялічыцца стыпендыя. Аднак на новую надбаўку многія з “стыпендыятаў” ня здолеюць набыць нават кілё прыстойнай варанай каўбасы, ня кажучы ўжо пра вэнджаную.

У адпаведнасьці з пастановай ураду “Аб памерах дзяржаўных стыпендыяў навучэнцаў” дадзеныя выплаты павінны павялічыцца ў 1,2 разы. Такім чынам, калі раней студэнт штомесяц атрымоўваў 20 тыс. рублёў на жыцьцё, то зараз яму “адваляць” ажно 24 тысячы. Аднак, як патлумачылі карэспандэнту «БДГ» у Савміне, гэты “царскі” падарунак не зьвязаны з простым і зразумелым жаданьнем зрабіць студэнцкае жыцьцё больш забясьпечаным. Яшчэ 1 верасьня ўрад прыняў рашэньне аб павелічэньні тарыфнай стаўкі 1-га разраду для аплаты працы работнікаў бюджэтных арганізацыяў і структур, якія атрымоўваюць дзяржаўныя датацыі. Паколькі стыпендыі таксама маюць бюджэтны пачатак, студэнты павінны былі адчуць на сабе клопат радзімы яшчэ ў верасьні.
Трэба адзначыць, Савмін заднім чыслом, 23 кастрычніка, пастанавіў павялічыць стыпендыі з 1 верасня. Гэта азначае, што будзе зроблены пераразьлік, і многія студэнты адзіначасна атрымаюць стыпендыю, павялічаную не ў 1,2, а напрыклад, у 1,4 разы, аднак пасьля ўсё стане на сваё месца.