“Белпошта” нясе страты :: Хартыя'97 :: Навiны

На фоне агульных станоўчых паказчыкаў працы галіны сувязі за 9 месяцаў сёлетняга году закляпочанасьць выклікае эканамічны стан рэспубліканскага аб’яднаньня “Белпошта”. Пра гэта заявіў міністар сувязі Ўладзімер Ганчарэнка на паседжаньні калегіі 31 кастрычніка. На сёньня страты ад рэалізацыі прадукцыі маюць усе абласныя прадпрыемствы паштовай сувязі, асабліва няпростая сытуацыя ў “Віцебскаблпошты” і “Магілёўаблпошты”. А страты ад рэалізацыі ў агуле па аб’яднаньні за трэці квартал сёлетняга году склалі 2,8 мільярды рублёў.

Прычына такой сытуацыі ў тым, адзначыў Уладзімер Ганчарэнка, што з 1 ліпеня 2002 году пастановай ураду зьніжаныя тарыфы на паслугі пошты па выплаце пэнсіі. І сёньня яны аказваюцца па цане ніжэй за сабекошт.
З-за спаду рэнтабельнасьці за апошнія тры месяцы было закрыта 24 стратныя аддзяленьні сувязі. Аднак пагаршэньне абслугоўваньня насельніцтва не зьяўляецца выхадам з сытуацыі, неабходна шукаць іншыя крыніцы паляпшэньня фінансавага стану прадпрыемстваў, падкрэсьліў міністар. У прыватнасьці, працягваць працу па ўпарадкаваньні кадраў, актывізаваць правядзеньне падпісной кампаніі на пэрыядычныя выданьні, перагледзіць дамовы з банкамі. Неабходна пашырыць аказаньне нетрадыцыйных для аддзяленьняў сувязі паслуг – гандаль таварамі народнага спажываньня, рассылку каталёгаў прадукцыі мясцовай прамысловасьці, аказаньне фотапаслуг.