МЗС Расеі: “Газпром” не павялічыць аб’ёмы пастаўкі газу ў Беларусь :: Хартыя'97 :: Навiны

Пытаньне аб скарачэньні паставак расейскага газу ў Беларусь зьяўляецца выключна эканамічным, заявіў журналістам у панядзелак афіцыйны прадстаўнік МЗС Расеі Аляксандар Якавенка. Спроба МЗС Беларусі “трактаваць рашэньне аб скарачэньні паставак расейскага газу ў рэспубліку як “наўмысную акцыю па аказаньні эканамічнага ціску”, паводле Якавенкі, ня мае пад сабой рэальных падставаў, перадае карэспандэнт РИА "Новости".

Прадстаўнік расейскага МЗС нагадаў, што пастаўкі ў Беларусь прыроднага газу ажыцьцяўляюцца на аснове штогадова прымальных бакамі балянсаў паліўна-энэргетычных рэсурсаў. Плянамі на 2002 год, зацьверджанымі ў красавіку, прадугледжваецца пастаўка ў Беларусь 16,5 млрд. кубамэтраў газу, зь іх, у адпаведнасьці з кантрактамі, заключанымі беларускім бокам, 10,1 млрд. кубамэтраў паставіць “Газпром” і 6,3 млрд. кубамэтраў – кампанія “Итера”.
“Наколькі вядома, “Газпром” свае абавязацельствы выканаў, і ўжо зараз беларускія спажыўцы амаль цалкам выбралі яго квоту”, - адзначыў дыплямат.
Паводле ягоных словаў, у сувязі з адсутнасьцю ў “Газпрома” свабодных неразьмеркавальных аб’ёмаў прыроднага газу на 2002 год, павялічыць яго пастаўкі ў Беларусь звыш узгодненых раней аб’ёмаў газу па ільготных коштах не падаецца магчымым.
“Улічваючы, што кошт прыроднага газу, які пастаўляецца незалежнымі пастаўшчыкамі, у тым ліку спажыўцам у самой Расеі, у нас вызначаецца на рынкавай аснове, беларускі бок першапачаткова быў інфармаваны аб мэтазгоднасьці дамаўляцца наўпрост з кампаніяй “Итера” аб пастаўках газу ў рэспубліку ў другім паўгодзьдзі 2002 году на ўзаемапрымальных умовах”, - сказаў Якавенка.
“Відавочна, што гэтае пытаньне зьяўляецца выключна эканамічным, і яго трэба вырашаць у адпаведнасьці з дамоўленасьцямі па фармаваньні адзінай эканамічнай прасторы, у тым ліку міжурадавым пагадненьні аб пашырэньні супрацоўніцтва ў газавай галіне”, - падкрэсьліў прадстаўнік МЗС РФ.