Улады спяшаюцца разьлічыцца з Расеяй за газ :: Хартыя'97 :: Навiны

Прэм’ер-міністар Беларусі Генадзь Навіцкі ў жорсткай форме запатрабаваў ад ураду і кіраўнікоў абласьцей забясьпечыць на 100 адсоткаў разьлікі з Расеяй за газ, а таксама пачаць пагашэньне запазычанасьці. У прыватнасьці, вобласьці да канца году павінны знайсьці магчымасьць і пералічыць у дзяржаўны бюджэт больш за 50 мільярдаў беларускіх рублёў (каля 26,5 мільёнаў даляраў).

Як перадае карэспандэнт РИА "Новости", сытуацыя са скарачэньнем паставак расейскага газу 1 лістапада стала тэмай экстраннай сэлектарнай нарады беларускага ўраду з кіраўнікамі рэгіёнаў.
Генадзь Навіцкі адзначыў, што 4 сутак прадпрыемствы краіны працуюць у надзвычайным рэжыме. “Такой сытуацыі ў нас яшчэ не было”, - сказаў прэм’ер.
Кіраўніцтва краіны прымае “вычарпляльныя” меры, каб нармалізаваць абстаноўку. Ужо пагашаныя цякучыя плацяжы за кастрычнік і за перавышэньне ліміту адбору расейскага газу.
Навіцкі паведаміў, што на дадзеным этапе разглядаецца магчымасьць стоадсоткавай прадаплаты расейскаму боку паставак газу за лістапад і сьнежань.
Нагадаем, што расейскі “Газпром” запатрабаваў ад беларускага боку з 1 лістапада скараціць на 50 адсоткаў адбор паліва з магістральнага газапроваду. Гэтае патрабаваньне было заснаванае на тым, што Беларусь вычарпала ліміт атрыманьня газу на сёлетні год.
У адказ афіцыйны Менск выступіў зь вельмі рэзкай заявай, у якой назваў скарачэньне паставак газу акцыяй “па аказаньні эканамічнага ціску на Рэспубліку Беларусь”.