Вернікі заяўляюць аб ушчамленьні іх правоў і свабод :: Хартыя'97 :: Навiны

Грамадзянская ініцыятыва "За свабоднае веравызнаньне" заяўляе, што новы закон аб свабодзе веравызнаньняў і рэлігійных арганізацыях, падпісаны Аляксандрам Лукашэнкам, ушчамляе канстытуцыйныя правы грамадзян.

31 кастрычніка кіраўнік краіны Аляксандар Лукашэнка падпісаў закон аб свабодзе веравызнаньняў і рэлігійных арганізацыях, шэраг палажэньняў якога супярэчаць нормам міжнароднага права, дзеючай канстытуцыі Беларусі, а таксама Грамадзянскаму і Жыльлёваму кодэксам краіны, закону аб друку. Пра гэта гаворыцца ў адкрытай заяве грамадзянскай ініцыятывы "За свабоднае веравызнаньне".
Механізм рэалізацыі многіх нормаў новага закона не прапісаны, што дае падставы для суб`ектыўных дзеяньняў чыноўнікаў у справе рэгістрацыі і ацэнкі дзейнасьці рэлігійных грамадаў. Прэамбула закона вызначае, якім канфэсіям надаецца прыярытэтнае права для свайго развіцьця.
"Асаблівую трывогу, - гаворыцца ў заяве Грамадзянскай ініцыятывы "За свабоднае веравызнаньне", - выклікае сытуацыя, у якой аказваюцца групы грамадзян, якія сумесна вызнаюць рэлігію, аднак не жадаюць набываць статус юрыдычнай асобы. Адпаведна нормам новага закона, гэтыя грамадзяне могуць быць прыцягнутыя да адміністратыўнай адказнасьці".
Фактычна закон абавязвае грамадзяніна дэкляраваць сваю рэлігійную прыналежнасьць. Такім чынам, дзяржава " ўстанавіла жорсткі кантроль над духоўным жыцьцём кожнага чалавека."
"Новы закон, - гаворыцца далей у заяве, - сур`ёзна ўскладніў умовы для рэгістрацыі рэлігійных структур і дазволіў органам дзяржаўнай улады прымусова рэгуляваць разьвіцьцё канфэсій".
Ад новага закону, падпісанага Аляксандрам Лукашэнкам, "пацерпіць самая тонкая і недатыкальная сфэра жыцьця грамадзян, што прывядзе да рэлігійнай дэстабілізацыі ў грамадстве".