НАПАД НА ЛІДЭРА АГП АНАТОЛЯ ЛЯБЕДЗЬКУ :: Хартыя'97 :: Навiны

Старшыня Аб’яднанай грамадзянскай партыі Анатоль Лябедзька паўгадзіны таму падвергся нападу невядомых асобаў. Лябедзька знаходзіўся ля амбасады ЗША ў Менску. У гэты момант да яго пад’ехаў аўтамабіль, зь якога выскачылі некалькі чалавек у штацкім. Яны не прад’явілі дакумэнтаў і сілай запіхнулі яго ў машыну і зьвезьлі ў невядомым накірунку. Анатоль Лябедзька пасьпеў патэлефанаваць сваім калегам у штаб-кватэру АГП і паведаміў нумар аўтамабілю – 1663 МН. Праз гадзіну Лябедзьку адпусьцілі. Паводле папярэдняй інфармацыі, Лябедзьку адвезьлі ў Камітэт дзяржаўнай бясьпекі.

На дадзены час супраць Анатоля Лябедзькі распачатая крымінальная справа. Лідэра АГП падазраваюць у паклёпе адносна прэзыдэнта (арт.367, частка 1 Крымінальнага кодэксу Рэспублікі Беларусь). Крымінальная справа распачатая ў сувязі з публікацыяй у “Народнай волі” ў лістападзе 2001 году артыкула, у якім Лябедзька абвінавачвае ўрад Лукашэнкі ў пастаўках зброі дзяржавам-ізгоям. Палітыку пагражае да чатырох гадоў турмы. Паводле папярэдняй інфармацыі, адносна гэтых артыкулаў яго і дапытвалі ў КДБ.
Акрамя таго, вядома, што 14 лістапада Лябедзька зьбіраўся ляцець у Вашынгтон, дзе павінен быў прымаць удзел у канфэрэнцыі “Беларусь пасьля Лукашэнкі”, наладжанай “Новай Атлянтычнай ініцыятывай”.
Сёньня а 18.00 у штаб-кватэры АГП адбудзецца прэсавая канфэрэнцыя, дзе Лябедзька распавядзе пра падрабязнасьці здарэньня.