АБСЭ мае намер працягваць працу ў Беларусі на сталай аснове :: Хартыя'97 :: Навiны

Старшыня Сталай рады Арганізацыі па бясьпецы й супрацоўніцтву ў Эўропе (АБСЭ), сталы прадстаўнік Партугаліі пры АБСЭ пасол Франсіска Сэйхас да Кошта заявіў у аўторак у Вене пра тое, што АБСЭ мае намер працягваць сваю дзейнасьць у Беларусі на сталай аснове.

Як перадае карэспандэнт РИА "Новости", на паседжаньні Сталай рады Франсіска Сэхас да Кошта сказаў, што АБСЭ “пакажа гібкасьць у гэтым пытаньні з тым, каб дабіцца падаўжэньня мандата на ажыцьцяўленьне дзейнасьці групы дарадцаў і маніторынгу АБСЭ ў Беларусі”. “Будучы склад місіі АБСЭ ў гэтай краіне павінен будзе мець магчымасьць ажыцьцяўляць маніторынг і дакладваць у сакратарыят АБСЭ аб разьвіцьці сытуацыі ў Беларусі, уключна з аспэктамі захаваньня правоў чалавека”, - сказаў ён.
Як адзначыў старшыня Пострады, АБСЭ гатовая ў любы момант пачаць перамовы зь беларускімі ўладамі адносна дзейнасьці Групы дарадцаў і маніторынгу.
У канцы кастрычніка апошні супрацоўнік Місіі АБСЭ ў Беларусі пакінуў Менск у сувязі з тым, што ўлады адмовіліся падоўжыць візу на знаходжаньне ў краіне на той падставе, што супрацоўнікі арганізацыі нібыта падтрымліваюць апазыцыю.
Дзейнасьць АБСЭ ў Беларусі цяпер практычна спыненая.