Лукашэнка прыгразіў Батуры крымінальнай справай :: Хартыя'97 :: Навiны

Аляксандар Лукашэнка 5 лістапада прыняў з дакладам старшыню Камітэту дзяржаўнага кантролю Анатоля Тозіка. Кіраўнік дзяржавы выказаў незадаволенасьць ходам і якасьцю будаўніча-мантажных прац у раённым шпіталі Касьцюковічаў. Аляксандар Лукашэнка выказаў заўвагі ў адрас Камітэту дзяржкантролю і падкрэсьліў, што пэрсанальную адказнасьць за захаваньне тэрмінаў і якасьці будуць несьці губэрнатар Магілёўскай вобласьці Барыс Батура, міністар архітэктуры й будаўніцтва Генадзь Курачкін, намесьнік прэм’ер-міністра, які курыруе будаўніцтва. Усе недахопы павінны быць ліквідаваныя за кошт віноўных: ніводнага дадатковага рубля ў гэтых мэтах выдавацца ня будзе. У супрацьлеглым выпадку адносна адказных асоб Камітэтам дзяржаўнага кантролю могуць быць распачатыя крымінальныя справы.

Анатоль Тозік таксама даклаў аб выніках праверкі эфэктыўнасьці выкарыстаньня матэрыяльных дзяржаўных рэсурсаў і бюджэтных сродкаў у розных сфэрах народнай гаспадаркі. Камітэтам выяўленыя жахлівыя факты налічэньня нічым не абгрунтаваных памераў заробкаў кіраўнікам арганізацыяў, якія цалкам фінансуюцца або датуюцца зь бюджэту. У бліжэйшы час Камітэт дзяржаўнага кантролю комплексна дасьледуе гэтую праблему і ўнясе адпаведныя прапановы Лукашэнке.
Падчас сустрэчы разглядаліся таксама папярэднія вынікі працы дзяржаўнай камісіі па расьсьледаваньні злоўжываньняў у цэлюлозава-папяровай прамысловасьці. Камісія распачала й расьсьледуе больш за 10 крымінальных справаў.