Пагаршаецца псыхалягічнае здароўе прафэсара Бандажэўскага :: Хартыя'97 :: Навiны

Сваякі прафэсара Юры Бандажэўскага, асуджанага да 8 гадоў пазбаўленьня волі за атрыманьне хабару, 4 лістапада мелі магчымасьць сустрэцца зь ім у калёніі ўзмоцненага рэжыму ў Менску, дзе ён адбывае пакараньне.

Як паведаміла ў інтэрвію БелаПАН жонка асуджанага Галіна Бандажэўская на доўгачасовым спатканьні былі маці і двое дзяцей прафэсара. “Мяне больш за ўсё апошнім часам хвалюе здароўе мужа, - сказала Г.Бандажэўская. – Апошнія часам ён зьмяніўся, выглядаў вельмі прыгнечаным і ва ўсім расчараваным. Ён кажа, што ня можа працаваць, бо ня мае навуковай інфармацыі, губляе навуковую кваліфікацыю. Гэтая ізаляцыя ў першую чаргу ўплывае на яго псыхалягічны стан. Ён ня верыць у магчымасьць свайго вызваленьня, скардзіцца на адсутнасьць сна, боль сэрца, страту апетыту”.Са словаў Г.Бандажэўскай, у адрас кіраўніцтва Беларусі, прэзыдэнта трапляе шмат зваротаў міжнароднай грамадзкасьці з просьбамі даць магчымасьць прафэсару працаваць і вызваліць яго ад такога жорсткага пакараньня. Апошнім часам да А.Лукашэнкі зьвярнуліся шэраг ляўрэатаў Нобелеўскай прэміі, прадстаўнікі “Міжнароднай амністыі” і іншых праваабарончых арганізацыяў. Ю.Бандажэўскі гатовы паехаць на вольнае пасяленьне ў радыяктыўна забруджаную зону, паведаміла яго жонка. Скарга на вырак па справе Ю.Бандажэўскага прынятая да разгляду Камітэтам па правох чалавека ААН. У той самы час, паводле словаў жонкі прафэсара, прадстаўнікі беларускіх уладаў намякаюць ёй і мужу, што для яго памілаваньня неабходна прызнаньне віны. Аднак Ю.Бандажэўскі віноўным сябе ня лічыць.