У Дзярждуме адбудуцца слуханьні па праблеме палітычных зьнікненьняў у Беларусі :: Хартыя'97 :: Навiны

На аўторкавым паседжаньні Кансультацыйнай рады апазыцыйных палітычных партыяў было заяўлена, што 12 лістапада ў расейскай Дзярждуме адбудуцца парлямэнцкія слуханьні, прысьвечаныя пытаньню беларускіх зьніклых.

На паседжаньні КРАПП дакладаў Міхаіл Пліска - прадстаўнік Аб`яднанай Грамадзянскай партыі, зь ініцыятывы якой і адбудуцца парлямэнцкія слуханьні ў расейскай Дзярждуме.
Ён паведаміў, што пытаньне зьніклых - гэта тая праблема, у вырашэньні якой расейскія дэпутаты могуць аказаць рэальную падтрымку беларускім апазыцыянэрам. Міхаіл Пліска нагадаў, што пра лёс Юрыя Захаранкі, Зьмітра Завадзкага, Віктара Ганчара і Анатоля Красоўскага расейскія дэпутаты ўжо ведаюць, бо пасьля сёлятняга візыту ў Дзярждуму сваякоў зьніклых лідэры буйнейшых фракцыяў Дзярждумы нават зьвярталіся да расейскага прэзыдэнта Пуціна па дапамогу.
Акрамя таго дэпутат расейскай Дзярждумы Сяргей Кавалёў ачоліў адмысловую камісію Парлямэнцкай асамблеі Рады Эўропы, якая таксама павінна дамагацца адмысловага расьследаваньня гучных палітычных зьнікненьняў у Беларусі.
Паводле Міхаіла Пліскі, вынікам слуханьняў у Дзярждуме можа стаць стварэньне адмысловай расейскай камісіі, а таксама ўдзел расейскіх спэцыялістаў у расьследаваньні справаў зьніклых.
"Мы спадзяемся, што слуханьні прыцягнуць увагу ня толькі расейскай, але і беларускай грамадзкаcьці да таго, што адбываецца ўнутры Беларусі. Зьнікненьне людзей ня ёсьць унутранабеларускай справай", - сказаў Міхаіл Пліска.
З крытыкай пазыцыі АГП на паседжаньні КРАПП выступіў намесьнік старшыні Народнай Грамады Уладзімер Нісьцюк. Ён нават агучыў адмысловую заяву, у якой зьвінаваціў АГП у манапалізацыі тэмы зьніклых.
Акрамя таго лідэр ліберал-дэмакратаў Сяргей Гайдукевіч у эмацыйнай форме патлумачыў, што ён бы ні ў якім выпадку не паехаў у Маскву, а спрабаваў вырашыць сытуацыю ў Беларусі.
Зрэшты, як высьветлілася, Сяргея Гайдукевіча ніхто ў Маскву і не запрашаў. На слуханьні паедуць лідэр АГП Анатоль Лябедзька, ягоны намесьнік Яраслаў Раманчук, які непасрэдна і займаецца арганізацыяй слуханьняў, Валянціна Палевікова, дэпутат «палаты прадстаўнікоў» Валеры Фралоў ды інш.