Міхаіл Чыгір: беларускія прадпрыемствы не гатовыя плаціць за газ па сусьветных коштах :: Хартыя'97 :: Навiны

З чацьвярга ў Беларусі па распараджэньні Аляксандра Лукашэнкі пачаў дзейнічаць, як ён выказаўся, “режим жесточайшей экономии газа”. Лукашэнка запатрабаваў ад ураду рэспублікі поўнай аплаты паставак газу й пагашэньня пазык расейскаму “Газпрому” за наступны год, а таксама паабяцаў, што на шэраговых грамадзян краіны падзеі не паўплываюць. Былы прэм’ер-міністар Міхаіл Чыгір паведаміў “Нямецкай хвалі”, што для рэжыму жорсткай эканоміі энэргіі перш за ўсё патрэбныя інвэстыцыі, якія сёньня ў краіне адсутнічаюць.

Паводле ягоных словаў, беларускія прадпрыемствы не гатовыя плаціць за газ па сусьветных коштах, хаця сёньня і плоцяць дзяржаве за кубамэтар газу ў два разы болей, чым “Газпрому”. Экс-прэм’ер лічыць, што можна за год аддаць пазыку "Газпрому", гэта больш за 200 мільёнаў даляраў, але на гэта пойдуць усе валютныя рэзэрвы краіны. Для шэраговых грамадзян рэжым жорсткай эканоміі, сказаў Чыгір, паўплывае на павелічэньне аплаты за карыстаньне энэргіяй. Напярэдадні Аляксандар Лукашэнка раскрытыкаваў “Газпром”, які зь першага лістапада ўдвая скараціў пастаўкі газу ў Беларусь, а таксама расейскае кіраўніцтва. Крэмль, на думку Лукашэнкі, такім чынам аказвае на яго беспрэцэдэнтны палітычны ўціск. Лукашэнка запатрабаваў ад “Газпрому” вяртаньня грошай, сэканомленных ад ільгот у прадстаўніцтве беларускага ўчастку газапроваду “Ямал-Заходняя Эўропа”, а ад Крамля – пяцьсот мільёнаў даляраў, згубленых пры спагнаньні ўскосных падаткаў. Лукашэнка адзначыў, што ўрад павінен быць гатовым плаціцць за газ па сусьветных коштах. Пры гэтым, падкрэсьліў ён, Расеі давядзецца плаціць за транзіт у некалькі разоў даражэй. Ёй таксама прад’явяць, як выказаўся Лукашэнка, “счет по мировым ценам” за паслугі, якія аказваюцца ёй Беларусяй - ад мытнай мяжы да аховы і абароны. Лукашэнка даручыў Савету міністраў неадкладна прапрацаваць пытаньні па альтэрнатыўных пастаўках энэргіі ў Беларусь. “Мы не можем далее терпеть такую зависимость и унижение от одной страны”, - заявіў Лукашэнка.