Ці едзе Лукашэнка на саміт НАТО? :: Хартыя'97 :: Навiны

Канчатковае рашэньне аб выдачы ці нявыдачы чэскай візы Аляксандру Лукашэнку для ўдзелу ў саміце НАТО павінна быць прынятым на гэтым тыдні. Як заявіў у чацьвер міністар замежных справаў Чэхіі Цырыл Свобада, “ніякага пэўнага рашэньня на дадзены момант няма, але мы, хутчэй, схіляемся да адмоўнага рашэньня”.Паводле ягоных словаў, “не хацелася б, каб сьвет успрымаў Лукашэнку як прызнанага дэмакратычнага прэзыдэнта”.

Напярэдадні кіраўнік МЗС Чэхіі заявіў, што чэскі ўрад павінен праверыць зьвесткі аб тым, што ў аўторак ля амбасады ЗША ў Менску быў затрыманы адзін зь лідэраў апазыцыі Аляксандар Лябедзька, якому могуць прад’явіць абвінавачваньні ў спробе дзяржаўнага перавароту.
“Мы перакананыя, што нам неабходна выказаць пэўную салідарнасьць з тымі, хто змагаецца за правы чалавека й дэмакратыю”, - падкрэсьліў кіраўнік чэскай дыпляматыі. “У сувязі з гэтым ня выключаецца магчымасьць таго, што візу могуць ня выдаць нават кіраўніку дзяржавы”, - дадаў ён.
Прэсавы сакратар чэскага ўраду Ганна Старкова паведаміла, што габінэт міністраў краіны на сваім паседжаньні ў сераду “заслухаў інфармацыю міністра замежных справаў Цырыла Свобады і прыняў яе да ўвагі”. Разгляду пытаньня выдачы візы Аляксандру Лукашэнку на паседжаньні ўраду надзялілі тры хвіліны. Канчатковае рашэньне ў дадзенай дыпляматычнай сытуацыі застаецца за міністэрствам замежных справаў Чэхіі.
У сваю чаргу, віцэ-прэм’ер чэскага ўраду, міністар юстыцыі Павал Рыхецкі заявіў журналістам, што паводле дыпляматычных каналаў са штаб-кватэры НАТО ў Брусэлі атрымана ўказаньне вырашыць пытаньне з прыездам Лукашэнкі на саміт НАТО іншым шляхам, чым нявыдачай яму ўязной візы ў Чэхію. У прыватнасьці, згадаў Рыхецкі, у Менск магчыма накіруюць ліст, дзе кіраўніку Беларусі рэкамэндуюць устрымацца ад паездкі ў Чэхію.
Між тым, перадае РIА "Новости", чэскія палітолягі і аналітыкі прызнаюць, што кіраўніцтва Чэхіі паставіла сябе ў складаную сытуацыю. З аднаго боку, Беларусь зьяўляеца сябрам праграмы НАТО “Партнёрства ў імя міру” і яе кіраўнік мае права прыняць удзел у мерапрыемствах альянсу разам з іншымі лідэрамі, але, зь іншага боку, чэскія ўлады вельмі жадаюць засьведчыць, што яны падтрымліваюць змагароў за правы чалавека й дэмакратыю ў Беларусі. Выказваюцца думкі, што, зацягваючы рашэньне пытаньня, чэскі ўрад імкнецца прымусіць Лукашэнку самому адмовіцца ад паездкі на саміт НАТО ў Празе.