Даляравы рэйтынг :: Хартыя'97 :: Навiны

За адсутнасьцю цікавай прадукцыі беларускія тэлеканалы перанесьлі канкурэнтную барацьбу зь інфармацыйнага поля на сацыялягічнае. БТ, ОНТ і СТВ праводзяць самавымяральныя працы, “зьліваючы” атрыманыя вынікі ў СМІ. Фехтаваньне на рэйтынгах, магчыма, дастаўляе ім спартовае задавальненьне, але рэальныя ацэнкі папулярнасьці выглядаюць сумна, калі глянуць на рэклямныя тарыфы.

З 1 лістапада тарыфы павысіла ня толькі чыгунка. Заказчыкі рэклямы на БТ, ОНТ і СТВ пераканаліся, што каналы, якія маюць найбольш шырокі ахоп вяшчаньня, моцна сябе запаважалі. Адначасова пацьвердзілася нескладаная праўда: усялякі прадукт каштуе столькі, колькі за яго можна ўзяць. А беларуская тэлепрадукцыя не каціруецца нават у саміх тэлевізійшчыкаў. Асноўны паток грошай яны плянуюць атрымаць па ранейшай схеме – акучваючы расейскую тэлевізійную “паляну” шляхам уцісканьня ўласных рэклямных блёкаў.
Рэкляма ў праграме БТ “Панарама: вынікі тыдня” прызнаная самай таннай (250 даляраў за хвіліну). За задавальненьне рэклямаваць свой прадукт у звычайнай штодзённай “Панараме” заказчык выкладзе ўжо 700 даляраў. За гэтыя грошы можна адрэклямавацца ў “Зеркале” зь Мікалаем Сванідзэ. Больш чым сьціпла на гэтым фоне выглядае СТВ са сваім вячэрнім выпускам навінаў “24 гадзіны” (130 даляраў). Праграма “Время” (3 200 даляраў) па-ранейшаму застаецца любімым відовішчам беларусаў, а праект ОНТ “Наши новости”, “прышпілены” да яе, здольны, на думку яе ўладальнікаў, даваць штохвілінна ня менш за 3 тыс. даляраў.
Выснова напрошваецца нескладаная. Нягледзячы на ўсе размовы аб стварэньні ўласнага інфармацыйнага поля ў Беларусі і “засільле” расейцаў на нашым рынку, ніводны з нацыянальных тэлеканалаў без гэтага “засільля” проста ня выжыве.