У Беларусі найгоршае сярод краін СНД сальда замежнага гандлю :: Хартыя'97 :: Навiны

У Беларусі склалася найгоршае сярод краін СНД сальда замежнага гандлю. Паводле вынікаў студзеня-жніўня 2002 году, якія падсумаваў у лістападзе Міждзяржаўны статыстычны камітэт, адмоўнае замежнагандлёвае сальда Беларусі склала 293,7 млн. даляраў ЗША. Далей ідуць Армэнія - 279,9 млн., Грузія - 258,5 млн., Малдова - 236,7 млн., Кіргізія - 54,8 млн., Таджыкістан - 12,4 млн. У астатніх краін СНД сальда станоўчае: у Азэрбайджана - 136,3 млн. даляраў, Украіны - 485 млн., Казахстана - 1 млрд. 513,9 млн., Расеі - 36 млрд. 354,7 млн. Па Туркмэністану і Узбэкістану дадзеных у статкамітэта няма.

Пры гэтым па памеру адмоўнага сальда ў гандлі з краінамі СНД Беларусь займае другое месца (967,8 млн.) пасьля Ўкраіны (2 млрд. 960,1 млн.). У той самы час у гандлі зь дзяржавамі па-за СНД краіна мае значны станоўчы балянс (674,1 млн.), што дазволіла ёй заняць чацьвёртае месца пасьля Расеі (33 млрд. 323,7 млн.), Украіны (3 млрд. 445,1 млн.) і Казахстана (2 млрд. 33,1 млн.).
У студзені-жніўні ў гандлёвым балянсе большасьці краін СНД адзначана зьмяншэньне экспарту ў дзяржавы Садружнасьці. Паводле тэмпаў спаду (на 7 адсоткаў) Беларусь падзяліла 5-6-я месцы з Армэніяй. Горш з экспартам у краіны СНД было ў Казахстана (зьніжэньне на 22 адсоткі), Таджыкістана (на 19), Украіны (на 17) і Кіргізіі (на 16). Рост зафіксаваны толькі ў Грузіі (на 18 адсоткаў), Малдовы (на 3) і Расеі (на 0,2).
Адначасова заўважна павялічыўся экспарт прадукцыі краін Садружнасьці ў дзяржавы па-за СНД. Па росту гэтага паказчыка (на 17 адсоткаў) Беларусь заняла чацьвёртую пазыцыю пасьля Армэніі (на 55), Малдовы (на 24) і Таджыкістана (на 20).