Ігар Ляшчэня: кіраўніцтва НАТО недастаткова дэмакратычнае :: Хартыя'97 :: Навiны

Як лічыць памочнік Аляксандра Лукашэнкі Ігар Ляшчэня, сапраўдныя прычыны нежаданьня кіраўніцтва НАТО бачыць дэлегацыю рэспублікі на саміце ў Празе заключаюцца ў тым, што “там ведаюць прынцыповую пазыцыю Беларусі па пашырэньні Паўночнаатлянтычнага альянсу”. Ляшчэня лічыць, што “кіраўніцтва НАТО яшчэ недастаткова дэмакратычнае, каб быць гатовым пачуць пазыцыю, якая не супадае са сваёй уласнай”.

Паводле афіцыйнага прадстаўніка Менску, пазыцыя Беларусі заключаецца ў тым, што “разам з распадам Варшаўскай дамовы зьнік праціўнік, а значыць і прычына існаваньня НАТО”. Беларусь лічыць, што “пашырэньне НАТО не дадасьць бясьпекі на эўрапейскім кантыненце”.
Акрамя таго, мяркуе Ляшчэня, “Беларусі ня могуць дараваць зьбітага над стратэгічным аб’ектам краіны паветранага шара” (паветраны шар зь некалькімі грамадзянамі ЗША быў зьбіты некалькі гадоў таму над тэрыторыяй Беларусі сіламі СПА рэспублікі – "Интерфакс"). Памочнік кіраўніка дзяржавы таксама ўпэўнены, што “Беларусі ня могуць дараваць прынцыповую пазыцыю аб недапушчальнасьці ўмяшальніцтва ва ўнутраныя справы сувэрэннай дзяржавы і безальтэрнатыўнага сілавога рашэньня ў канфліктных сытуацыях, асабліва насуперак адпаведных рэзалюцыяў Рады бясьпекі ААН”. У якасьці прыклада Ляшчэня прывёў пазыцыю Беларусі па Югаславіі і Іраку. “Кіраўніцтва НАТО яшчэ недастаткова дэмакратычнае, каб быць гатовым пачуць пазыцыю, якая не супадае са сваёй уласнай”, - канстатаваў памочнік беларускага лідэра.