Нямцоў паскардзіўся беларускаму ўраду на КДБ :: Хартыя'97 :: Навiны

Лідэр Саюзу правых сілаў і яго парлямэнцкай фракцыі Барыс Нямцоў накіраваў у Савет міністраў Беларусі скаргу на дзеяньні беларускага КДБ, у выніку якіх 23 кастрычніка ён быў дэпартаваны зь Менску ў Расею як пэрсона нон-грата.

У сваёй скарзе Нямцоў просіць “прызнаць незаконным і адмяніць” рашэньне аб ягонай дэпартацыі як “не заснаванае на законе й неабгрунтаванае, а таксама рэалізаванае з грубымі парушэньнямі вызначанай заканадаўствам працэдуры”. У інтэрвію "Интерфаксу" адвакат Вадзім Прохараў, які прадстаўляе інтарэсы Нямцова, патлумачыў, што згодна адміністратыўнаму і грамадзянска-працэсуальнаму заканадаўству Беларусі, фізычная ці юрыдычная асоба, ня згодная з якімі-небудзь рашэньнямі адносна яго, павінна да звароту ў суд накіраваць адпаведны зварот у вышэйшую інстанцыю. Прохараў адзначыў, што калі Савет міністраў Беларусі не задаволіць скаргу Нямцова, то ён зьвернецца з адпаведным зыскам на КДБ Беларусі ў адзін з судоў Менску.