Беларусь аб’явіла сябе самым надзейным партнёрам Іраку :: Хартыя'97 :: Навiны

Віцэ-прэм’ер беларускага ўраду Ўладзімер Дражын заявіў, што Ірак у асобе Беларусі мае “самага надзейнага партнёра” па ўсіх накірунках сумеснай дзейнасьці. Як перадае карэспандэнт РIА "Новости", такую заяву Дражын зрабіў, прымаючы міністра аховы здароўя Іраку доктара Умаіда Мубарака, які завяршае афіцыйны пяцідзённы візыт у Менск.

Паводле Дражына, Беларусь “падтрымлівае Ірак па ўсіх пытаньнях, зьвязаных з палітыкай, якая праводзіцца адносна яго ў сьвеце”. Віцэ-прэм’ер выказаўся супраць санкцыяў, якія ААН і асобныя дзяржавы прымяняюць да Іраку.
Віцэ-прэм’ер падкрэсьліў, што Беларусь выступае за вырашэньне ўсіх праблемаў вакол Іраку мірным шляхам і лічыць, што прымяненьне сілы цягне за сабой пакуты мірнага насельніцтва.
З улікам пагаршэньня гуманітарнай сытуацыі ў Іраку ў выніку больш чым дзесяцігадовага пэрыяду рэжыму санкцыяў, Беларусь гатовая пастаўляць у Ірак мэдычныя прэпараты і абсталяваньне, што вырабляецца ў рэспубліцы, а таксама накіраваць сваіх дактароў для абмену досьведам і падрыхтоўкі ірацкіх спэцыялістаў у галіне аховы здароўя, паведаміў Дражын.
Міністар аховы здароўя Іраку паведаміў, што дэлегацыя, якую ён ачольвае, складаецца з галоўных спэцыялістаў у галіне нэйрахірургіі, радыяцыйнай мэдыцыны, фармацэўтыкі, наведала шэраг лячэбных установаў Менску, пазнаёмілася з абсталяваньнем і сучаснымі мэтодыкамі лячэньня асобных захворваньняў. Дэлегацыя наведала канцэрн “Белбіяфарм”, АТ “Белмэдпрэпараты”, Беларускі дзяржаўны мэдычны ўнівэрсытэт.
Паводле вынікаў візыту падпісаны пратакол супрацоўніцтва з Іракам у галіне аховы здароўя і фармацэўтыкі.
Пратакол, у прыватнасьці, прадугледжвае, што да канца сёлетняга году ў Багдадзе пройдзе выстава беларускага медабсталяваньня й лекавых прэпаратаў.