“Газпром”: Беларусі выгадна выкачваць з Расеі танныя рэсурсы :: Хартыя'97 :: Навiны

У аўторак у Дзяржаўнай думе ў часе парлямэнцкіх слуханьняў па канцэпцыі расейска-беларускай інтэграцыі прагучалі заявы, якія могуць даць разьвіцьцё скандалу з пастаўкамі газу ў Беларусь.

“Беларусі бок не дапускае расейскіх газавікоў для працы з канчатковымі спажыўцамі ў сваёй краіне”,- пра гэта, як паведамляе НТВ, заявіў сёньня намесьнік старшыні праўленьня ААТ “Газпром” Аляксандар Разанаў.
Ён паведаміў, што Расея прадае Беларусі газ па 24 даляры за тысячу кубамэтраў, у той час як пакупнік расейскага паліва рэалізуе яго ўнутры краіны ў два разы даражэй – за 48 даляраў.
Таму, паводле Разанава, беларускі бок ня йдзе на інтэграцыю ў газавай сфэры і сам працуе з канчатковымі спажыўцамі. Ёй выгадна выкачваць з Расеі танныя рэсурсы.
Пры гэтым на долю Беларусі прыпадае 60 адсоткаў экспартаў расейскага газу, падкрэсьліў Разанаў. Такім чынам, адзначыў Разанаў, за апошнія чатыры гады Расея “прафінансавала Беларусь на 2 млрд. даляраў”. Зь іх 800 млн. даляраў – чыстыя страты “Газпрому”.
“Усе нашыя прапановы па акцыянаваньні расейскіх і беларускіх газавых прадпрыемстваў натыкаюцца на супрацьдзеяньні зь беларускага боку”, - адзначыў ён.
Калі так будзе працягвацца і далей, то Расеі, на думку Разанава, нічога не застанецца, як правесьці газапровад у Эўропу па дну Балтыйскага мора.
Ён падкрэсьліў, што эканамічная падтрымка Беларусі Расеяй шляхам пастаўкі газу па ільготных коштах павінна ажыцьцяўляцца пры захаваньні беларускім бокам умоваў, накіраваных на стварэньне спрыяльнага інвестыцыйнага клімату для расейскіх газавых кампаніяў, якія жадаюць працаваць на беларускім рынку. Пра гэта паведамляе ИТАР-ТАСС.