Прэзыдэнтам Беларусі і Ўкраіны ня ўзрадуюцца ў Празе :: Хартыя'97 :: Навiны

У НАТО лічаць, што прэзыдэнты Беларусі і Ўкраіны могуць прыехаць на НАТОўскі саміт у Празе, але ім ня варта разьлічваць на сардэчны прыём, паведамляе карэспандэнт РІА "Новости". Высокапастаўлены натаўскі дыплямат, які выступаў у сераду на брыфінгу на ўмове ананімнасьці, падкрэсьліў, што Паўночнаатлянтычны альянс зразумела заявіў аб непажаданасьці бачыць у Празе Аляксандра Лукашэнку, “бо ягоныя дзеяньні не адпавядаюць духу партнёрства з НАТО”. Што тычыцца Леаніда Кучмы, то ў НАТО “ёсьць праблемы даверу” да яго.

У той самы час у НАТО няма ніякіх законных падставаў адмовіць абодвум прэзыдэнтам у магчымасьці прыехаць на саміт, бо іх краіны зьяўляюцца паўнапраўнымі членамі Рады Эўраатлянтычнага партнёрства (РЭАП) і праграмы “Партнёрства дзеля міра”. Кожная дзяржава мае права вызначаць узровень свайго прадстаўніцтва на форумах гэтых арганізацыяў, якія пройдуць у рамках праскага саміту.
Кучма ўжо меў размову на гэтую тэму ў пятніцу па тэлефоне з генэральным сакратаром НАТО Джорджам Робертсанам. Дадзеных пра такі кантакт Лукашэнкі з Брусэлем пакуль няма.
Іншы ананімны натаўскі чыноўнік, прагназуючы магчымы сцэнар, ня выключыў, што кіраўнікі краін НАТО могуць пакінуць залю паседжаньняў пры зьяўленьні Лукашэнкі й Кучмы.