Тэрмін тэрміновай вайсковай службы ня будзе скарочаны :: Хартыя'97 :: Навiны

Скарачэньне тэрміну тэрміновай службы ў Беларусі на дадзеным этапе не прадугледжваецца, заявіў на паседжаньні сэсіі “палаты прадстаўнікоў” у чацьвер міністар абароны Леанід Мальцаў.

Як перадае карэспандэнт “Медиафакта”, кіраўнік ваеннага ведамства краіны падаў “дэпутатам” законапрект аб унясеньні зьменаў у закон “Аб Усеагульным вайсковым абавязку і вайсковай службе”, які быў прыняты “парлямэнтарамі” ў першым чытаньні.
Паводле Мальцава, першапачаткова плянавалася скараціць тэрмін службы да аднаго году, для маладых людзей з вышэйшай адукацыяй, якія не прайшлі вайсковую катэдру – да 9 месяцаў, з вайсковай катэдрай – да 6 месяцаў. Аднак, як адзначыў міністар, пасьля прапрацоўкі законапраекту з іншымі ведамствамі высьвятлілася, што “становішча не дазваляе зьнізіць тэрмін вайсковай службы ў памежных і ўнутраных войсках”. “Таму мы прыйшлі да думкі аб неабходнасьці пакуль пакінуць сёньняшнія тэрміны службы”, - сказаў Мальцаў.
Між тым, паводле ягоных словаў, “канцэпцыя і плян будаўніцтва Ўзброеных сілаў не сканчваюцца сёньняшнім днём”. “Тэрмін завяршэньня рэалізацыі праграмы рэфармаваньня войска датуецца 2006 годам. І я ўпэўнены, што гэтая праблема (скарачэньне тэрміну службы – “МФ”) будзе вырашаная”, - заявіў Мальцаў.
Кіраўнік ваеннага ведамства паведаміў, што новая рэдакцыя закону плянуе выключэньне панятку “ўсеагульны” вайсковы абавязак, бо асобныя грамадзяне краіны не выконваюць вайсковы абавязак, у прыватнасьці, па стану здароўя ці вызваленыя ад яго.
Паводле інфармацыі Мальцава, зьмены ў закон прадугледжваюць устанаўленьне “службы ў рэзэрве”, стварэньне “стройнай сыстэмы абавязковай і добраахвотнай падрыхтоўкі грамадзян да вайсковай службы, а таксама выключэньне шэрагу супярэчнасьцяў у нарматыўна-прававых актах”.