Міхаіл Хвастоў абвінаваціў дзяржавы НАТО ў беспрынцыповасьці :: Хартыя'97 :: Навiны

Пазыцыя дзяржаваў НАТО па пытаньні выдачы візаў афіцыйнай беларускай дэлегацыі на саміт Рады Эўраатлянтычнага партнёрства (РЭАП) дэманструе “беспрынцыповасьць” у эўрапейскіх справах, а таксама зьяўляецца “ўмяшальніцтвам ва ўнутраныя справы Беларусі”. Пра гэта, як паведамляе “Медиафакт”, у чацьвер у Менску заявіў журналістам міністар замежных справаў Беларусі Міхаіл Хвастоў.

“Беларусь едзе не на саміт НАТО, а на саміт РЭАП”, - падкрэсьліў міністар.
Хвастоў назваў рашэньне, “прынятае на ўзроўні Рады НАТО, аб непажаданасьці ўдзелу дэлегацыі Беларусі на чале з прэзыдэнтам” неадпаведным сучасным умовам эўрапейскай рэчаіснасьці, захаваньню рэгіянальнай эўрапейскай і міжнароднай бясьпекі.
Пры гэтым Хвастоў адзначыў, што пытаньне настолькі востра стаіць у Чэхіі, што ўрад разглядаў яго на сваім паседжаньні. Міністар выказаў спачуваньне свайму калегу – кіраўніку МЗС Чэхіі, якому, паводле інфармацыі Хвастова, прэзыдэнт Чэхіі перадаручыў прынятае рашэньне. “Я разумею, што чэскі МЗС знаходзіцца ў складаным становішчы”, - з іроніяй сказаў міністар.
Паводле дадзеных беларускага замежнапалітычнага ведамства, у панядзелак “зноў зьбярэцца Рада НАТО для таго, каб вырашыць, выдаваць ці не выдаваць нам візу”. Хвастоў лічыць такое становішча “цалкам недапушчальным”. “Рашэньне аб выдачы візаў павінна быць прынятым чэскім бокам у духу дэмакратычных прынцыпаў, якія вызнае НАТО”, - лічыць дыплямат.
Акрамя таго, міністар выказаў упэўненасьць, што Расея як член “дваццаткі” павінна падтрымаць Беларусь.
Кажучы пра магчымыя меры адносна Чэхіі, Хвастоў заявіў, што яны будуць адэкватнымі. “У дыпляматычнай практыцы ёсьць шмат прыкладаў, калі спыняліся дыпляматычныя адносіны, адзываліся амбасадары”, - адзначыў кіраўнік МЗС. Беларусь, паводле ягоных словаў, таксама будзе гатовая перагледзіць гандлёва-эканамічныя адносіны з Чэхіяй “на карысьць іншых краін”. “Гандлёвыя адносіны з Чэхіяй традыцыйна складваюцца на карысьць Чэхіі, якая экспартуе ў Беларусь больш, чым імпартуе”, - нагадаў кіраўнік МЗС.