Статкевіч прапануе выдаць чэскую візу для Лукашэнкі :: Хартыя'97 :: Навiны

Учора ў Варшаве пачалося паседжаньне Рады Партыі эўрапейскіх сацыялістаў. У паседжаньні бяруць удзел шэраг прэм’ер-міністраў, парлямэнтараў і лідэраў сацыял-дэмакратычных, сацыялістычных і рабочых партыяў краінаў Эўропы. Сярод дэлегатаў форуму і беларускія сацыял-дэмакраты – старшыня Аб’яднанай сацыял-дэмакратычнай партыі Валянціна Палевікова і лідэр Беларускай сацыял-дэмакратычнай партыі (Народная Грамада) Мікола Статкевіч. Лідэр БСДП НГ Статкевіч заклікаў эўрапейцаў дазволіць Лукашэнку прыехаць у Прагу на саміт НАТО.

Паводле ягоных словаў, кіраўніку Беларусі, які спрычыніўся да ізаляцыі краіны як з Захаду, так і з Усходу, цяпер трэба даць шанец зрабіць крок у накірунку Захаду: "Я думаю, трэба даць Лукашэнку візу, увесьці на некалькі тыдняў мараторый на санкцыі супраць Беларусі. Каб Лукашэнка пабачыў, што дзьверы на Захад трошкі прыадкрытыя..." Лідэр БСДП (НГ) зьбіраецца абмеркаваць пытаньне выдачы чэскай візы для Лукашэнкі ў часе заплянаванай сустэчы з прэм’ер-міністрам Чэхіі.
Як перадае Радыё Свабода, беларуская тэма прагучала на канфэрэнцыі яшчэ двойчы. Адчыняючы працу форуму, сьпікер польскага Сэйму Марэк Бароўскі сказаў, што Польшча ня хоча, каб пасьля далучэньня да Эўразьвязу на яе ўсходняй мяжы паўстаў мур, а прэм’ер-міністар Польшчы Лешэк Мілер пажадаў прадстаўнікам Беларусі “спаўненьня сну аб Эўропе”.
Даведка: Партыя эўрапейскіх сацыялістаў аб’ядноўвае 20 партыяў левага кірунку з краінаў Эўрапейскага Зьвязу і краінаў-кандыдатаў на далучэньне да аб’яднанай Эўропы. За 10 гадоў існаваньня ПЭС дамаглася значнага палітычнага ўплыву, яна ёсьць другой сілай у Эўрапарлямэнце. Сёлетняе паседжаньне Рады Партыі прысьвечанае абмеркаваньню будучага пашырэньня Эўрапейскага зьвязу і ўтрыманьня пазыцыяў сацыял-дэмакратыі ва ўмовах новай Эўропы.