Істотна вырас кошт падпіскі на пэрыядычныя выданьні :: Хартыя'97 :: Навiны

У Беларусі ідзе падпіска на газэты й часопісы на першае паўгодзьдзе 2003 году. Акрамя мясцовых у каталогі ўключаныя выданьні 16 краін блізкага і далёкага замежжа (Расеі, ЗША, Вялікабрытаніі, Літвы, Францыі, Славакіі, Нямеччыны, Казахстану, Японіі і іншых). У параўнаньні з першым паўгодзьдзем сёлетнега году кошт беларускіх і асабліва замежных друкаваных СМІ істотна павялічыўся, паведамляе БелаПАН.

У прыватнасьці, паўгадавыя камплекты газэт “Советская Белоруссия”, “Рэспубліка” і “Народная газета” (для індывідуальных падпісчыкаў, без уліку ільгот і зьніжак) падаражэлі на 59,1 адсоткі (кожны - з 13.200 рублёў на першае паўгодзьдзе 2002 году да 21.000 рублёў на першае паўгодзьдзе 2003 году). Падпісацца на газэту “Звязда” стала даражэй на 52,4 адсоткі (19.200 рублёў замест 12.600), “Знамя юности” - на 43,8 (13.800 замест 9.600). Кошт падпіскі на газэту “Народная воля” (для індывідуальных падпісчыкаў, без уліку ільгот і зьніжак) павялічылася на 66,7 адсоткаў (з 18.000 да 30.000 рублёў), “Комсомольская правда” в Белоруссии” - на 51,9 (з 39.978 да 60.720), “Белорусская деловая газета” - на 45,8 (з 27.996 да 40.806), “Белорусский рынок” - на 35,7 (з 12.336 да 16.740), “Белорусская газета” - у 2,57 разы (з 9.306 да 23.940).
Самымі дарагімі беларускімі выданьнямі зьяўляюцца “Спорт-экспресс” у Белоруссии” - 101.100 рублей за камплект на паўгода, “Белорусская торговая газета” - 88.092, “Из рук в руки” - 84.102, “Национальная экономическая газета” - 69.084.
Кошт падпіскі на расейскую газэту “Труд” вырас у 2,27 разы (з 24.804 да 56.286 рублей). “Московский комсомолец” падаражэў на 41,8 адсоткі (з 36.636 да 51.948 рублёў пры атрыманьні пяці нумароў у тыдзень, з 45.246 да 64.176 рублёў пры атрыманьні шасьці нумароў у тыдзень), “Известия” - на 53,3 адсоткі (з 39.318 да 60.288), “Аргументы и факты” - на 60,6 (з 12.870 да 20.670).
Сярод газэт далёкага замежжа (падпіска на іх праводзіцца на пэрыяд з 1 лютага 2003 году па 31 студзеня 2004 году) самымі дарагімі зьяўляюцца брытанскія “The Times” - 6.227.050 рублёў (3.291 даляр ЗША) і японская “Nikkei” - 3.651.054 (1.930). Брытанская газэта “Financial Times” будзе каштаваць 3.075.018 рублёў (1.625 даляраў), нямецкие “Sueddeutsche Zeitung” - 3.021.355 (1.597), “Die Welt” - 2.769.076 (1.464), французская “Le Monde” - 1.999.709 (1.057). Пры гэтым “Die Welt” падаражэла за год у 3,52 разы, “The Times” - у 3,11, “Financial Times” - на 64,8 адсоткі, “Le Monde” - на 44,3.