“Сургутнефтегаз” будзе ўдзельнічаць у аўкцыёне па продажу беларускіх акцыяў “Славнефти” :: Хартыя'97 :: Навiны

Расейскай нафтагазавая кампанія “Сургутнефтегаз” у сьнежні сёлетняга году будзе ўдзельнічаць у аўкцыёне па продажу акцыяў кампаніі “Славнефть”, якая знаходзіцца ва ўласнасьці Беларусі. Такая дамоўленасьць, як паведаміла “Медиафакту” крыніца ў беларускім урадзе, дасягнутая ў выніку сустрэчы прэзыдэнта “Сургутнефтегаза” Ўладзімера Багданава з кіраўніцтвам ўраду Беларусі, што адбылася ў панядзелак.

22 лістапада Беларусь выставіць на продаж 10,83% акцыяў кампаніі “Славнефть”, якія належаць Мінэканоміцы рэспублікі. Аднак, як лічаць незалежныя беларускія экспэрты, удзел патэнцыйных пакупнікоў у дадзеным аўкцыёне можа быць ускладненым, бо падаваць заяўкі на таргі маюць права толькі сябры сэкцыі фондавага рынку ААТ “Беларуская валютна-фондавая біржа”, якая дзейнічае ад сябе або ад асобы кліента. Экспэрты ня выключаюць, што ў дадзеным выпадку “беларускі бок можа прыняць рашэньне прадаць акцыі пэўнай кампаніі, а аўкцыён будзе праведзены толькі для выгляду”. Экспэрты непакояцца, што ў выпадку перамогі “Сургутнефтегаза” ў аўкцыёне (пры ўмове яго перамогі ў расейскім аўкцыёне) “гэтая кампанія можа стаць манапалістам па пастаўках нафты і нафтапрадуктаў на беларускі рынак, што непажадана з пункту погляду дзяржаўнай энэргетычнай бясьпекі краіны”.
За 10 месяцаў сёлетняга году НДК “Сургутнефтегаз” паставіла ў Беларусь каля 5 млн. т нафты, што складае амаль 50% паставак расейскай нафты ў 2002 годзе. Чакаецца, што кампанія ў лістападзе-сьнежні паставіць яшчэ ня меней за 1 млн. т, што ў агуле пераўзыдзе пастаўкі разам узятых кампаніяў “Лукойл”, “Славнефть” і “Юкос” у сёлетнем годзе. Згодна энэргетычнаму балянсу паміж Беларусяй і Расеяй, у 2002 годзе ў рэспубліку будзе пастаўлена каля 12 млн. т вуглевадароднай сыравіны.