“Белнафтахім” дамаўляецца з нафтавай кампаніяй Лібіі :: Хартыя'97 :: Навiны

З 13 па 17 лістапада сёлетняга году, у адпаведнасьці з рашэньнямі, дасягнутымі ў часе першага паседжаньня Беларуска-Лібійскай камісіі па эканамічным, гандлёвым і навукова-тэхнічным супрацоўніцтве, у Рэспубліцы Беларусь знаходзілася зь візытам дэлегацыя Нацыянальнай Нафтавай Кампаніі Лібіі. Мэтай візыту зьяўлялася азнаямленьне з досьведам і магчымасьцямі прадпрыемстваў канцэрну “Белнафтахім” у сфэры выведкі, здабычы і перапрацоўкі нафты. Сябры дэлегацыі наведалі шэраг прадпрыемстваў нафтахімічнага комплексу Беларусі (РУП “ВА Беларуснафта” і ААТ “Мозырскі нафтаперапрацоўчы завод”).

Як паведаміла прэсавая служба МЗС Беларусь, у часе візыту адбыліся перамовы ў канцэрне “Белнафтахім” з удзелам віцэ-прэзыдэнта канцэрну Сяргея Мішына. Беларускі бок інфармаваў лібійскую дэлегацыю аб патэнцыяле беларускага нафтахімічнага комплексу, аб вырабляемай прадпрыемствамі канцэрну прадукцыі.
Сябры лібійскай дэлегацыі азнаёмілі беларускі бок са структурай Лібійскай Нацыянальнай Нафтавай Кампаніі, выказалі зацікаўленасьць у супрацоўніцтве ў сфэры сэрвісных паслугаў (рамонт абсталяваньня і сьвідравінаў), стварэньні сумесных прадпрыемстваў, накіраваньні беларускіх спэцыялістаў у Лібію для працы па кантракту.
Бакі дамовіліся разьвіваць кантакты паміж дачэрнімі кампаніямі канцэрну “Белнафтахім” і Нацыянальнай Нафтавай Кампаніяй Лібіі па канкрэтных пытаньнях, у прыватнасьці, па ўкараненьні на нафтавых палях Лібіі перадавых беларускіх тэхналёгіяў.