Кіеў здолеў даць справаздачу толькі за 72 з 76 “Кальчуг” :: Хартыя'97 :: Навiны

Амэрыканскія і брытанскія экспэрты ў панядзелак апублікавалі справаздачу па выніках праверак ва Ўкраіне ў сувязі зь мяркуемымі пастаўкамі гэтай краінай радарных комплексаў “Кальчуга” Іраку. У справаздачы экспэрты ўказалі, што лічаць “дастаткова верагоднай” магчымасьць таго, што ўкраінскія ўлады насуперак санкцыяў ААН сапраўды паставілі рэжыму Садама Гусэйна некалькі “Кальчуг” праз неназваных пасярэднікаў, паведамляе Associated Press.

Група з 13 амэрыканскіх і брытанскіх экспэртаў, якія цягам тыдня знаходзіліся на тэрыторыі Ўкраіны, паведамілі ў справаздачы, што ім не ўдалося знайсьці доказу продажу кіраўніцтвам Украіны ўзбраеньняў Іраку “па адкрыта агучаных кантрактах”. Аднак у ім згадваецца, што ўкраінскі бок здолеў падаць дакумэнтацыю толькі на 72 з 76 радарных установак “Кальчуга”.
Улады Ўкраіны заявілі, што чатыры ўстаноўкі, якіх не хапае, былі прададзеныя Кітаю, але не дазволілі экспэртам пазнаёміцца з дакумэнтамі па гэтай зьдзелцы, матывуючы гэта тым, што ў іх утрымліваецца сакрэтная камэрцыйная інфармацыя.
Як сьцьвярджаюць экспэрты, украінскі бок адмовіўся ў поўнай меры азнаёміць іх з матэрыяламі ўласнага ўнутранага расьсьледаваньня па гэтай справе. Прадстаўнікі ўладаў Украіны, па сьведчаньні экспэртаў, часта проста адмаўляліся супрацоўнічаць зь імі.
У справаздачы згадваецца, што Вялікабрытанія і ЗША патрабуюць ад украінскага кіраўніцтва даць магчымасьць экспэртам задаць пытаньні былым афіцыйным асобам гэтай краіны – экс-кіраўніку Службы бясьпекі Ўкраіны Леаніду Дзеркачу і былому ганароваму консулу Ўкраіны ў Іраку Юры Аршанскаму, якіх, як заяўляюць украінскія афіцыйныя асобы, падчас працы экспэртаў не было ў краіне.
Акрамя таго, Украіна павінна падаць “дакумэнты па продажу “Кальчуг” у замежныя краіны, у першую чаргу ў Кітай” і перадаць ЗША і Вялікабрытаніі “інфармацыю аб месцазнаходжаньні станцыяў “Кальчуга” і ўкраінскіх тэхнічных спэцыялістаў на тэрыторыі КНР”.
Нагадаем, што 11 кастрычніка сёлетняга году лідэр БЮЦ Юлія Цімашэнка, спаслаўшыся на дадзеныя з шасьці розных крыніц, у тым ліку ад мытнікаў і вайскоўцаў, заявіла, што ў ноч з 10 на 11 кастрычніка 2002 году тры вагоны з дэталямі радарных устновак “Кальчуга” праз мытню “Новыя Ярацэвічы – Славуціч” былі завезеныя на тэрыторыю Ўкраіны зь Беларусі і разьмешчаныя на тэрыторыі вайсковай часткі ў Чарнігаўскай вобласьці. Гэтыя дзеяньні ўкраінскіх вайскоўцаў зьвязаныя з тым, што Ўкраіна павінна была праінфармаваць ЗША аб тым, што ўсе “Кальчугі”, якія павінны быць ва Ўкраіне, знаходзяцца на месцы, сказала Цімашэнка.