У Парыжы зьбярэцца Камісія ПАРЭ па вышуку зьніклых беларускіх апазыцыянэраў :: Хартыя'97 :: Навiны

27 лістапада ў Парыжы зьбярэцца адмысловая камісія Парлямэнцкай асамблеі Рады Эўропы па расьсьледаваньні абставінаў зьнікненьняў у Беларусі людзей па палітычных матывах. Пра гэта паведамляе афіцыйны інтэрнэт-сайт Рады Эўропы. Нагадаем, што камісія была створаная камітэтам па прававых пытаньнях і правах чалавека ПАРЭ. Ачоліў камісію расейскі дэпутат Сяргей Кавалёў, намесьнік старшыні – брытанскі палітык, лейбарыст Кевін Макнамара. У яе складзе 10 дэпутатаў – прадстаўнікі Бэльгіі, Вялікабрытаніі, Кіпра, Латвіі, Літвы, Расеі, Турцыі і Ўкраіны.

Камітэт зьбярэцца ў Парыжы, каб абмеркаваць інфармацыю, атрыманую ад беларускага ўраду датычна “чатырох асаблівых выпадкаў”. Маюцца на ўвазе зьнікненьні палітыкаў Юры Захаранкі і Віктара Ганчара, бізнэсоўца Анатоля Красоўскага і журналіста Зьмітра Завадзкага. Нагадаем, што 11 кастрычніка Сяргей Кавалёў накіраваў у беларускі парлямэнт дакумэнт з афіцыйнай інфармацыяй пра пачатак дзейнасьці камісіі і просьбай аб супрацоўніцтве. У пасланьні Кавалёва ўтрымліваўся шэраг пытаньняў, датычных зьнікненьняў Захаранкі, Ганчара, Красоўскага і Завадзкага, у прыватнасьці, - які статус расьсьледаваньняў па гэтых справах; на якім этапе яны знаходзяцца; як улады тлумачаць тое, што ім не ўдалося расьсьледаваць зьнікненьні згаданых асобаў; якія меры прымаюцца на дадзены момант для атрыманьня новай інфармацыі аб зьніклых і чым тлумачыцца тое, што слуханьне судовай справы па зьнікненьню апэратара Зьмітра Завадзкага было закрытым.
Падчас сустрэчы сябры камісіі падзеляцца сваімі высновамі і напрацоўкамі з прадстаўніком беларускага ўраду.