Прыём заявак на набыцьцё акцыяў “Славнефти” часова спынены :: Хартыя'97 :: Навiны

Фонд дзяржмаёмасьці Мінэканомікі Беларусі прыняў рашэньне прыпыніць да сярэдзіны дня 28 лістапада прыём заявак на набыцьцё акцыяў ААТ “Славнефть”, якія належаць беларускаму ўраду. Пра гэта гаворыца ў паведамленьні Беларускай фондавай біржы, якое паступіла ў менскае бюро РІА "Новости".

Гэтае рашэньне зьвязанае з намерам кіраўніцтва Фонду дзяржмаёмасьці правесьці сэрыю перамоваў з адзіным пакуль патэнцыйным пакупніком беларускіх акцыяў “Славнефти” – “Славнефтебанком”, які прадстаўляе інтарэсы расейскай нафтавай кампаніі “Сибнефть”.
Як паведамілі РІА "Новости" ў Мінэканомікі Беларусі, асноўнай тэмай перамоваў стане абмеркаваньне кошту беларускага пакету акцыяў.
22 лістапада Фонд дзяржмаёмасьці выставіў на продаж беларускі пакет акцыяў кампаніі “Славнефть” у аб’ёме 515087000 акцыяў, што складае 10,83 адсоткі ад усяго статутнага фонду расейска-беларускай кампаніі. Пачатковы кошт пакету акцыяў вызначаны ў памеры 6,3 млрд. расейскіх рублёў.
Беларускі бок прапануе завяршыць разьлікі па продажу беларускага пакету акцыяў “Славнефти” да 5 сьнежня.
Беларускія ўлады прынялі рашэньне аб продажы пакету акцыў кампаніі адразу пасьля распараджэньня расейскага прэм’ера аб прыватызацыі “Славнефти”, падпісанага ў сярэдзіне лістапада.
У адпаведнасьці з дакумэнтам, урад Расеі прыняў прапанову Мінмаёмасьці, узгодненую з Мінэнэрга і Расейскім фондам федэральнай маёмасьці, аб прыватызацыі ў 2002 годзе акцыяў фэдэральнай уласнасьці ААТ “Нефтегазовая компания “Славнефть” у памеры 74,95 адсоткаў статутнага капіталу.
Аўкцыён па продажу пакету акцыяў нафтавай кампаніі “Славнефть” адбудзецца 18 сьнежня ў Маскве.