Дзярждэпартамэнт увёў афіцыйную забарону на ўезд Лукашэнкі ў ЗША :: Хартыя'97 :: Навiны

Урад ЗША спыняе выдачу ўязных візаў для “афіцыйных і прыватных паездак” Аляксандру Лукашэнку, а таксама яшчэ сямі “іншым высокапастаўленым афіцыйным асобам ягонага ўраду”. Як перадае карэспандэнт РІА “Новости” пра гэта аб’явіла прэсавая служба Дзярждэпартамэнту ЗША, згодна заяве якой забарона на выдачу амэрыканскіх візаў для Лукашэнкі і шэрагу асноўных сябраў беларускага кабінэту ўступіла ў сілу ў аўторак, 26 лістапада.

ЗША “ўводзяць гэтыя беспрэцэдэнтныя меры з-за цяглага размыцьця правоў чалавека і дэмакратычных прынцыпаў у Беларусі, у асаблівасьці ў сувязі з прымусовым закрыцьцём назіральнае групы АБСЭ, якая базуецца ў Менску”, згадваецца ў заяве Дзярждэпартамэнту, дзе адзначаецца, што забарона на выдачу візаў беларускім кіраўнікам адбываецца “ў тандэме” з 14 дзяржавамі-сябрамі ЭЗ.
Амэрыканскі ўрад “будзе сачыць за сытуацыяй у Беларусі і прымаць рашэньні аб працягу гэтай візавай палітыкі”, паведаміла прэсавая служба, паводле дадзеных якой, ЗША “віталі б вяртаньне Назіральнае групы АБСЭ ў Менск”.
“Беларусь павінна зрабіць крокі па палітычнай лібэралізацыі і павазе правоў чалавека, калі яна спадзяецца палепшыць узаемаадносіны зь міжнароднай супольнасьцю і скончыць з самаізаляцыяй”, адзначаецца ў заяве.