Старыя таварышы – Пуцін і Лукашэнка :: Хартыя'97 :: Навiны

Лукашэнка зноў за аб’яднаньне з Масквой, бо Захад яго ігнаруе. Яму ня далі візы, каб паехаць у Прагу на саміт НАТО. 14 дзяржаваў ЭЗ разам з ЗША аб’явілі яго нявыязным: Аляксандар Лукашэнка, апошні дыктатар Эўропы, усё больш і больш аказваецца ізаляваным. Таму вельмі лягічна, што ён зьвяртаецца да свайго старога патрнёра на Ўсходзе. Учора Лукашэнка сустракаўся ў Маскве з прэзыдэнтам Расеі Ўладзімерам Пуціным.

Адносіны заўважна сталі больш прахалоднымі пасьля таго, як у жніўні Пуцін нечакана прапанаваў стварэньне саюзу зь Беларусяй на ўмовах, якія азначалі б фактычнае далучэньне да Расеі. Аднак Лукашэнка ня можа павярнуцца да Масквы сьпіной. Краіна эканамічна залежыць ад старэйшага брата: увесь газ і 80 адсоткаў нафты пастаўляецца з Расеі, і Масква зьяўляецца найважнейшым гандлёвым партнёрам. Так што абодва кіраўніка дзяржаваў пацьвердзілі ўчора сваё імкненьне да аб’яднаньня, а Лукашэнка аспрэчваў новую замежнапалітычную арыентацыю на Заходнюю Эўропу. З пункту погляду апазыцыі падтрымка з боку Расеі зьяўляецца адным з важнейшых фактараў для ўлады Лукашэнкі. У пазытыўны ўплыў Расеі на дыктатара ў Менску ніхто ня верыць. “Надзея, што дэмакратыя прыйдзе ў Беларусь з Усходу, нерэальная”, -- кажа лідэр Беларускага Народнага Фронту Вінцук Вячорка, які наведаў Бэрлін. Лукашэнка, паводле ягоных словаў, атрымаў бы на апошніх выбарах меней галасоў, калі б яго не падтрымала Расея.
Згодна апазыцыі, дыктатара падтрымлівае толькі кожны пяты беларус, і, наадварот, 75 адсоткаў грамадзян – за зьбліжэньне з ЭЗ. Якім чынам рэжыму ўдаецца трымаць уладу? Перш за ўсё, шляхам застрашэньня, кажа Анатоль Лябедзька – лідэр Аб’яднанай грамадзянскай партыі. З часу верасьнёўскіх прэзыдэнцкіх выбараў маштаб рэпрэсіяў стаў яшчэ большым.