Эўрапарлямэнт ня ўбачыў у Беларусі прагрэсу :: Хартыя'97 :: Навiны

“Намаганьні беларускага ўраду спыніць працу Кансультатыўна-назіральнае групы АБСЭ яшчэ больш ускладнілі адносіны паміж Беларусяй і эўрапейскімі дэмакратычнымі інстытутамі”. Пра гэта гаворыцца ў распаўсюджанай заяве дэлегацыі Эўрапейскага парлямэнту.

Дэлегацыя знаходзілася ў Беларусі з 27 па 29 лістапада і прымала ўдзел у міжнароднай навукова-практычнай канфэрэнцыі “Пашырэньне Эўразьвязу і Беларусь: у пошуках новай палітыкі”, перадае БелаПАН. Яе ачоліў сябра Эўрапейскай партыі сацыялістаў Ян Марынус Віерсма (Нідэрлянды). У склад дэлегацыі ўвайшлі Элізабэт Шрёдтэр (Нямеччына) і сябра Эўрапейскай народнай партыі і Партыі эўрапейскіх дэмакратаў Робэрт Гудвіл (Вялікабрытанія).
Мэтай візыту было “даручэньне дадатковай інфармацыі аб апошніх падзеях у Беларусі, а таксама падрыхтоўка справаздачы ў Эўрапарлямэнце аб сытуацыі ў краіне і далейшае абмеркаваньне адносінаў з краінамі, якія стануць новымі сябрамі ЭЗ пасьля завяршэньня працэсу пашырэньня”. У часе абмеркаваньня дэлегаты зьвярталіся да “сваёй ацэнкі палітычнай сытуацыі ў Беларусі, дадзенай у часе парлямэнцкіх выбараў у 2000 годзе і прэзыдэнцкіх выбараў 2001 году, якая была выпрацаваная ў цесным супрацоўніцтве з Парлямэнцкай асамблеяй Рады Эўропы і АБСЭ”. У прыватнасьці, прадстаўнікі Эўрапарлямэнту “спрабавалі вызначыць, ці адбыліся нейкія станоўчыя зьмены ў сытуацыі, зьвязанай з свабодай прэсы, свабодай слова, у разьвіцьці незалежнай парлямэнцкай сыстэмы, станаўленьні паўнавартаснай грамадзянскай супольнасьці і плюралістычнай дэмакратычнай сыстэмы”.
Сябры дэлегацыі “з жалем адзначаюць, што ні ў адной з вышэйзгаданых сфэр прагрэсу не было дасягнута прагрэса”. У заяве згадваецца, што рашэньне, прынятае краінамі ЭЗ аб забароне на выдачу візаў шэрагу вышэйшых службовых асобаў Беларусі, у тым ліку прэзыдэнту, зьяўляецца “адэкватнай рэакцыяй на адмаўленьне беларускіх уладаў супрацоўнічаць з эўрапейскай дэмакратыяй”.
У той самы час сябры дэлегацыі заяўляюць, што “будуць вітаць і падтрымліваць кожны шчыры крок, накіраваны на вяртаньне КНГ АБСЭ з захаваньнем галоўных складнікаў ейнага мандату па назіраньні і садзеяньню дэмакратычным пераўтварэньням у Беларусі”. Беларусь зьяўляецца “часткай эўрапейскага кантыненту”, падкрэсьліваецца ў заяве, аднак “упартае нежаданьне ўладаў прыняць і захоўваць асноўныя чалавечыя і дэмакратычныя каштоўнасьці, на якіх трымаецца ЭЗ і іншыя эўрапейскія інстытуты, прывядзе яшчэ да большай ізаляцыі краіны ад падзеяў, якія адбываюцца ў Эўропе”.
“У інтарэсах беларускага народа”, як гаворыцца ў заяве, дэлегацыя яшчэ раз падкрэсьлівае “сваю прыхільнасьць да садзеяньня і падтрымкі ўсіх тых у Беларусі, хто імкнецца спыніць гэтую самаізаляцыю, хто гатовы садзейнічаць дэмакрытычным і эканамічным пераўтварэньням у рэспубліцы і яе інтэграцыі ў эўрапейскія структуры”. “Пераўтварэньне Беларусі ў дэмакрытчнага і паважанага суседа супадае з інтарэсамі ЭЗ”, - адзначаецца ў дакумэнце.